ORANJESTAD (AAN)/Den Haag – Minister Plenipotenciario mr. Ady Thijsen a forma parti di un discusion durante di e simposio
“Levende cultuur en een duurzame samenleving binnen het Koninkrijk” (Cultura bibo y un sociedad duradero den Reino) di Stichting Benelux Universitair Centrum B.U.C.
E simposio a tuma lugar den e Raadzaal di Gemeente Den Haag. Segun presidente di B.U.C. profesor dr. Anton van der Geld, esaki ta e prome simposio di e “Praktijkleerstoel ‘Duurzame Samenleving’.
Despues di un palabra di bon bini di Burgemeester di Den Haag Jan van Zanen tabata tin presentacion di diferente oradornan entre nan mr. Mildred Schwengle, Staatsraad pa Aruba na Raad van State, Profesor dr. Jan Peter Balkenende, Minister van Staat y Reinier van Zutphen, e Nationale Ombudsman di Hulanda.
Sra. Schwengle den su discurso a pasa riba algun pensamento tocante e relacionnan den Reino Hulandes. Profesor Balkenende a papia riba un orientacion nobo riba economia di mercado cu ta na fabor di un sociedad duradero.
E Nationale Ombudsman a hiba un discurso riba gobierno y ciudadano y con ta crea un brug entre e ombudsman nan den Reino.
Despues di e seccion aki e programa a continua cu e asina yama “Rondetafelgesprek” unda e tres Ministernan Plenipotenciario di Curaçao, St. Maarten y Aruba a trece un ponencia padilanti. Minister Thijsen a trece su ponencia unda e ta bisa cu lo mester bin un bon ehecusion di e “Onderlinge Regeling” y cooperacion riba e reformanan; e “Geschillenregeling” mester bin y cu mester haci mihor uso di articulo 17 di Statuut, unda ta duna e parlamentarionan di e paisnan - na momento cu nan participa na un debate den Tweede Kamer como “bijzondere gedelegeerden - derecho di voto, banda cu ya caba nan tin derecho di entrega di amienda y mocion.
E mandatario a bolbe remarca cu, aunke cu tin un mocion pa bin cu un areglo asina, cual mocion por conta riba un mayoria grandi den tanto Eerste como Tweede Kamer, e “Geschillenregeling” te ainda no a bira realidad. Minister Thijsen riba e punto aki a haya aporte di miembro di Tweede Kamer pa D66 Jorien Wuite, unda e ta bisa cu en bes di warda riba iniciativa di Gobierno di Hulanda pa bin cu un Ley di Reino (rijkswet), e Minister Plenipotenciario tin e mandato pa e mes bin cu un Ley di Reino asina.
Den su totalidad un simposio hopi interesante cu e trece hopi punto di bista riba topiconan cu ta regarda e relacion den Reino Hulandes.
E potretnan ta cortesia di Arubahuis
