ORANJESTAD (AAN) - Diahuebs mainta, minister di Husticia y Asuntonan Social sr. Rocco Tjon, a reuni cu e teamchef di Recherche Samenwerkingsteam (RST) y Procurador General di Aruba,
despues di a ricibi e plan di maneho di RST for di su Colega Minister di Husticia di Hulanda.
E enfoke di e plan aki ta basa riba combati crimen organisa y corupcion, door di inverti den departamentonan di inteligencia y informacion, pero tambe den personal atraves di diferente curso y training. Muy pronto lo bay delibera riba e plan di maneho aki, durante e Justitieel Vierlanden Overleg na juni binidero.
Colaboracion cu Recherche Samenwerkingsteam (RST) ta un cooperacion entre Hulanda, Aruba, Caribe Hulandes (Boneiro, Saba y St. Eustatius), Curaçao y St. Maarten, cual ta existi pa hopi aña caba. Nan ta colabora cu e unidad local cu ta combati crimen organisa, cu landsrecherche y tambe nos departamentonan di inteligencia. Tur esaki bou autoridad y mandato di Aruba.
Agentenan policial cu ta resorta bou di RST ta autorisa pa conduci investigacionnan entre e paisnan di Reino Hulandes den Caribe, bou autorisacion di e Ministerio Publico di e pais caminda e investigacion ta tuma luga. Banda di esaki, e agentenan aki ta autorisa pa conduci e investigacionnan aki usando solamente e metodonan y recursonan cu ta wordo permiti pa e pais. Por nota cu tin mas recurso cu lo wordo poni disponibel pa amplia siguridad na nos frontera, conduci mas investigacion cu tin aspectonan di crimen organisa y "ondermijning" (corupcion).
Por ultimo, e mandatario a indica cu ya caba a percura pa mantene e presupuesto di Ministerio Publico, Landsrecherche y KPA intacto. Esaki ta sigui mehora, mirando cu Hulanda tambe ta aloca mas fondo pa RST pa di e forma aki por sigui eleva siguridad.
