ORANJESTAD (AAN) – Prome Minister Evelyn Wever-Croes den un mensahe pa pueblo en general, a elabora tocante e accionnan organiza pa e lidernan sindical Diaranzon,
pa manifesta contra e expansion di e reduccion di 12.6% di salario di empleadonan publico, no obstante cu FASE a stop.
“En bista di e accionnan cu awe a wordo organiza pa e lidernan sindical, mi kier reitera e posicion di gobierno. Gobierno di Aruba a compronde e lucha sindical, y tin comprension pa e posicion di e empleadonan. Y kier bisa cu gobierno di Aruba kier mescos cu e lidernan sindical. Nos tur kier mira recuperacion di nos pais, pa asina tur hende por gana e salario y bay cas cu e salario cu nan ta traha pe; y mi ta invita sindicatonan pa dialoga”! Asina Premier Wever-Croes a menciona.
E mandatario a expresa cu el a extende e invitacion aki for di siman pasa caba, pa sinta na mesa y haya tur e informacion financiero cu nan ta bisa cu nan no a haya ainda; ban yega na un punto di salida conhunto, y hunto bay negocia cu Hulanda.
“Esaki ta e solucion cu ta trece beneficio no solamente pa e trahado pero tambe pa gobierno y e ta trece claridad. Lamentablemente, no ta tur sindicato a acepta e propuesta aki y gobierno lo sigui cu esnan cu si a acepte. Mi a ripara tambe cu, lamentablemente, tin lidernan politico cu ta malusa e lucha sindical aki, y kier mancha esaki. Pesey tambe durante mi reunion, mi alerta sindicatonan pa percura pa nan lucha, cu mi ta sigur cu cada lider sindical ta hiba un lucha sindical y no politico, pero patras di nan tin politiconan cu agenda politico cu ta purba mancha e lucha sindical, y pa e sindicalistanan ta hopi alerta na esaki”, e dignatario a subraya.
Minister Presidente a remarca cu e realidad ta cu Aruba ta depende di e sosten di likidez di Hulanda, pa e luna aki nos por paga salario di e propio empleadonan publico, pa paga bijstand y e bonus na bijstand, seguridad di nos pais, cuido medico, gastonan di enseñanza. “Nos ta depende e luna aki ainda, di e sosten di likidez di Hulanda y pa e siguiente seis lunanan nos dilanti. Esey ta e realidad cu nos ta biba den dje”, Prome Minister a acentua.
No obstante, Prome Minister a bisa cu e realidad tambe ta cu Aruba ta recuperando, e pais ta den pleno desaroyo y e tin hopi potencial. El a referi na e reunionnan cu gobierno tabata tin Diamars na San Nicolas y unda a wak e desaroyo cu ta tumando lugar den e distrito aki.
“Pero realidad ta cu e accionnan di e sindicalistanan ta afecta e recuperacion aki. Mas lihe nos recupera, mas lihe nos por bay bek na normalidad y mas lihe e recorte di salario por wordo elimina. Y mi ta reitera, nos kier mesun cos y pesey nos a acerca mediador y pesey awe, mi ta invita e sindicalistanan un biaha mas, pa nos continua cu dialogo”, Minister Presidente a subraya.
