Mientras mundo ta colecta informacion di conducta di Omicron --- Kerstboom di palet, negoshi di suls den ambiente di luz di color --- Sam ta yuda paga gasto di e Arubiano na caminda pa 2022
ORANJESTAD (AAN)- Kico ta pasa den cas di e Arubiano? Con e situacion ta den casnan di famianan cu e variante Delta di Covid-19 a stroba di mira un miho recuperacion economico, financiero y social cu awe Omicron kier influencia?
Cientificonan rond mundo ta colecta informacion di e malesa, cu ta ainda un misterio pa mayoria di pais.
Na Hulanda, gobierno ta puntra su mes kico lo ta futuro di Schiphol, e aeropuerto Hulandes cu a mira tanto Arubiano drenta y sali e parti Europeo di Reino.
E entrada di Eagle LNG ta papia di un futuro nobo pa e Pueblo, di cual gran parti no tin garantia di nan entrada of hasta a mira nan entrada baha of desaparece completamente.
E lucha di e Arubiano cu a trata na sigui hunga su sam, si asina situacion a permiti na 2021 ora poco poco recuperacion a cuminsa presenta cu mas turista, mas negoshi den e sector priva, cu ainda no por paga tur e salarionan cu e tabata paga prome cu economia a basha abou.
Hopi famia a trata na sigui cu nan sam, cu mester crea un fondo pa gastonan anual cu ta depende di e creacion di un fondo personal den un sistema bancario di Pueblo.
Diez luna 100 Florin of 500 Florin, dependiente di cuanto placa ta drenta. Un areglo pa cada hende haya su placa despues di e cantidad di luna acorda.
“Sobrevivi” tabata e palabra di e Arubiano na 2021 cu awor a cuminsa prepara cas pa celebra e temporada di fiesta.
Cushina a bira e centro laboral na hopi cas, caminda ta prepara platonan completo pero tambe sopi, suls, snacks bolo cu ta tene Florin den circulacion.
Creatividad ta bini dilanti sigur mientras ta prepara pa Pasco cu arbolitonan di palet y adornonan moderno pa Pasco, cu ta crea e oportunidad pa placa drenta carteranan cu a sufri durante e pandemia di Covid-19.
Poco poco por mira mas luz di Pasco na casnan pero tambe na e parkenan di luz, cu a cuminsa anuncia publico cu Pasco ta yega y cu Pasco, e final di 2021.
E naturalesa encantador di Aruba, ta papia di un 2022 cu ta na caminda.
Yobida ta sostene naturalesa, cu publico ta busca pa haya tambe material di obra di man unico cu ta papia di gran inventividad.
2021 no tabata facil pero na su salida, musica lo resona. Ya por scucha e instrumentonan cu mester trece alegria y duna optimismo na un Pueblo cu te ainda ta sufri di e resultadonan di Delta y ta conciente cu Omicron a anuncia su mes na mundo.
En espera di Pasco Aruba ta spera informacion di cientificonan cu mester determina kico Omicron lo por haci cu mundo, di cual Aruba tambe ta depende.
Pero oracion ta sigui na Aruba, un Pueblo di fe cu kier sigui cana cu curashi.
DIARIO ta parti di Aruba y ta pendiente tur loke ta pasa den e casnan, e famianan cu ta prepara pa 2022.
Placa ta sigui lora na Aruba, den holor di cuminda, musica di optimismo y aliento di creatividad pa luz por cende pa un futuro den cual lo sigui skirbi historia di un Pueblo, cu a enfrenta futuro y a traha pa e por logra!
