Tema principal ta: “Recuperacion di Aruba”
ORANJESTAD (AAN) – Minister Presidente, Evelyn Wever-Croes, a referi den conferencia di prensa Diabierna, na su biahe di trabao na Hulanda, proximamente.
E mandatario a duna di conoce cu su persona hunto cu Minister di Finanzas lo tin diferente bishita di trabao otro siman, y reunionnan na Hulanda riba e tema di recuperacion na Aruba.
“Nos lo presenta con Aruba ta recuperando. Con cu bay bin Aruba ta un di e paisnan mas fuertemente afecta, IMF mes a publica riba dje, pero na mesun momento, Aruba ta tambe un di e paisnan cu mas lihe ta recuperando den nos region”, Premier Wever-Croes a señala.
E dignatario a sigui splica cu e metanan di tur e reunionnan aki, ta pa presenta e recuperacion di Aruba y mira na unda Hulanda por yuda nos pa esaki por bay mas lihe. Esaki ta e tema principal, aunke claro lo elabora riba otro temanan tambe.
“Si nos mira con 2023 ta proyecta di ta, por weita cu e asuntonan di mas grandi cu tabata causa discusion entre Hulanda cu Aruba, a wordo atendi cune y resolvi. Nan ta tres palabracion cu nos a haci cu Hulanda na 2018 ora nos a drenta gobierno. Nos a palabra cu nos ta bay yega na un surplus; no a yega na un surplus na 2019 caba, pero lamentablemente 2020, apesar cu el a mustra prometedor nos no a logra concretize debi na e pandemia. Pero awor na 2023 den apenas tres aña nos a logra e surplus aki, y nos ta bek riba e trayecto di finanzanan publico sostenible cu nos tabata prome cu e pandemia”, Prome Minister a remarca.
E mandatario a agrega cu tambe e gastonan di personal di gobierno ta sigui baha, locual ta otro palabracion haci na 2018, y esey tambe ta algo cu a wordo resolvi y lo sigui mantene e nivel ey. E di tres palabracion ta locual ainda gobieno no por cumpli cune. “Esey ta e curva di e debe di nos GDP. Nos a palabra na 2018 cu na 2037 nos tin cu yega 50% di nos GDP. Cu e debe gigantesco di Covid-19, 916 miyon nos a presta di Hulanda, durante e pandemia. No no por yega e meta aki sin mas, y pesey nos ta bay Hulanda y lo presenta alternativanan y mira con Hulanda por yuda nos cu esaki”, Prome Minister a relata.
E mandatario a menciona diferente di e reunionnan cu e lo tin na Hulanda, entre otro cu Minister Presidente Rutte, Minister di Finanzas, Minister di Climate, ademas presentacionnan den Tweede y Eerste Kamer, tambe lo ta na Raad van Staten, y lo reuni cu diferente otro instancia riba temanan financiero, calculacion y estadistica.
Ademas lo reuni cu e Alcalde di Den Haag tocante cooperacionnan entre e municipionan y Aruba.
Riba invitacion di Premier Rutte, Prome Minister lo atende tambe un reunion cu ta trata historia di esclavitud, y e ta ripara cu esaki ta un tema hopi importante pa Hulanda. Talvez na Aruba ta menos importante, pero no ta kita afo cu si pa Hulanda ta importante Aruba por duna su aporte. “E posicion di Aruba ta cu nos ta contento cu nos ta wordo envolvi den e discusionnan aki y manera nan ta indicando hopi pais na mundo ta ofreciendo disculpa pa cu e historia di esclavitud, y aki na Aruba ta Minister Xiomara Maduro ta encarga cune, y un comision cu el a institui riba dje cu ta haciendo un tremendo trabao”, Minister Presidente a conclui.
