ORANJESTAD (AAN) – Prome Minister Evelyn Wever Croes, den conferencia di prensa a enfatiza cu no por tin bishita di campaña politico na casnan di nos ciudadanonan ya cu ken sa si un di esnan cu ta bati na bo porta, pa papia di politica, por ta un di e casonan nobo aki, y ta traspaso bo e virus na lugar di traspasa bo informacion.
“Claro, tin manera pa hiba campaña electoral. Partidonan politico ta den consulta cu Cuerpo Policial tur siman. Por ehemplo, ‘dos- dos’ por cana den bario pero no paden. Por tin actividad pero tur esaki den consulta cu Cuerpo Policial, manera cu a keda palabra”, Minister Presidente a duna di conoce.
E dignatario a señala cu mas lihe logra baha e casonan positivo y e op name di tur dia na Hospital, mas lihe nos vacuna nos comunidad, por flexibiliza mas e reglanan tambe.
E dignatario ta haci un yamada na comunidad pa sigui vacuna pa logra e 85% di nos poblacion vacuna, pa mitad di Mei. “Mi ta papia den nomber di hopi hende cu ta fada di tanto regla, di tanto cambio, pero e virus no a fada di nos. E tey ainda y e ta molestiando nos. E ta cambiando di variante cada biaha mas complica. Si bo tambe ta fada, anto haci algo!”, e dignatario a expresa.
