Evan Giel a splica con pa yuda via SMS:
ORANJESTAD (AAN) – Diabierna 30 di April, a tuma lugar e lanzamento di e campaña '5 for Kids' di Kiwanis Club of Palm Beach Aruba.
Richard Roy, Presidente di Kiwanis Club of Palm Beach Aruba, a duna bon bini na e presentenan den e evento, y a gradici Setar NV y Digicel, cu ta e principal sponsors, y seguidamente a pasa palabra pa Evan Giel, Presidente di e Comite di Campaña.
El a anuncia e campaña di donacion di SMS, cu Kiwanis Club of Palm Beach ta uni cu Setar y Digicel, y cu e organizacion ta masha gradici cu nan a haci posible pa habri un campaña unico.
Giel a expresa cu manera ta conoci awo ta masha dificil pa haci un campaña pa recauda fondo, door di e restriccionnan di Covid-19.
El a bisa cu Kiwanis Club of Palm Beach ta conoci pa su masquerade ball y benta di cuminda durante carnaval. Pero door cu no tabata tin carnaval e aña aki no por a genera ni un entrada pa duna bek na comunidad pa duna mucha.
E bez aki, den loke nan ta yama un “innovation comedy” nan a discuti algun proyecto di cual nan a realiza algun caba, y awo ta anuncia otro campaña cu ta esun di '5 for Kids'. E pakico nan ta yame “5 for Kids” ta pasobra nan kier un donacion di 5 florin.
“Si cada ciudadano na Aruba cu tin un telefon, y nos ta pensa cu Aruba henter mester tin uno; nos ta calcula cu por lo menos 100 mil hende ta cana cu telefon rond di Aruba, por manda un SMS pa e number 250 cu e texto ‘5 for Kids’. Haciendo esey bo ta haci un donacion directamente pa Kiwanis Club of Palm Beach, y asina ey bo ta participa tambe pa gana premionan atractivo. Nos tin mas cu 30 aña na Aruba y ta haci trabao pa mucha” el a menciona.
