ORANJESTAD (AAN)—Minister Presidente Evelyn Wever- Croes, a hiba palabra durante e lanzamento oficial di e concepto WE Aruba, Diabierna cu a pasa, cu a tuma lugar na J.F. Kennedy Education Center.
E dignatario a cuminza expresando palabranan di gradicimento na IBiSA, Departamento di Cultura, na Minister Endy Croes, cu a tuma e encargo aki y a duna e weganan escolar un bachi nobo.
El a gradici tambe e scol bestuurnan cu tabata presente, cabesante y docentenan pasobra sin nan sosten e lo a keda simplemente den un plan. E mandatario a tuma e palabranan di Minister Endy Croes, esta “Atravez di deporte y enseñanza ta caminda nos por yuda nos muchanan miho posible”.
“Mi ta sigur cu loke nos tur akiden tin den comun, ta e deseo pa un miho futuro y mas oportunidad pa cada un di nos muchanan. Kiermen, di parti di gobierno di Aruba, danki pa boso colaboracion den esaki, y mi ta desea boso hopi, hopi exito y indudablemente e lo ta un exito completo”, Prome Minister a expresa.
https://diario.aw/categories/noticia/general/minister-presidente-cu-palabranan-di-gradicimento-na-tur-cu-a-coopera-pa-we-aruba-ta-un-realidad#sigProId3dd77a32aa