Riba Dia di Archivo --- * Asina gobierno ta aporta na e Campaña 3C-TRECE di Archivo Nacional di Aruba
ORANJESTAD (AAN): Minister President Evelyn Wever-Croes a haci entrega na Minister di Finansa y Cultura Xiomara Maduro un hard drive cu tin e historia di Aruba durante e periodo di crisis di corona. Esaki ta contene tur conferencia di prensa desde 13 di maart 2019 te cu siman pasa. Ademas ta inclui tur programa special tocante e pandemia cu a wordo produci durante e periodo di e pandemia y mas informacion cu Pais Aruba a atende cu e crisis aki.
Un periodo cu a trece hopi reto y desafio, pero e forsa grandi di Aruba, e union y amor cu nos tin pa nos pais ta locual a yuda nos Pais pa recupera di dje y nos ta recuperando ainda. Minister President a trece dilanti cu e ta spera cu informacion aki por haya un bon lugar den nos archivonan. Pabien na tur ciudadano di nos Pais, pabien riba e Dia di Archivo.
Cu esaki tambe Gobierno di Aruba ta contribui y ta haci un apelacion na pueblo pa contribui tambe tabata e palabranan di e prome mandatario di nos Pais. Minister di Finansa y Cultura Xiomara Maduro a gradici Minister President Evelyn Wever-Croes, mas aun cu esaki a tuma luga riba e Dia di Archivo, esaki ta un detaye hopi importante pasobra e ta e topico e aña aki pa dia di archivo y archivo ta nos tur.
Minister Maduro a gradici Minister President y henter e team di PR di Gobierno cu a traha pa compila e informacion y archiva esaki pa nos por tine conserva pa nos Archivo Nacional di Aruba.
Di e manera aki Minister President y Minister di Finansa y Cultura tambe ta aporta na e Campaña 3C – TRECE, pa asina nos colecta, pa nos por conoce y conserva esaki pa e generacion cu ta sigui nos y como mandatario encarga cu Archivo Nacional di Aruba elo percura pa nos archivo nacional tine den nan coleccion.
