Minister President a bishita e famianan na San Nicolas afecta door di candela

Asina ta coordinando yudanza directo

ORANJESTAD (AAN): E aña nobo pa Aruba, lamentablemente, a cuminsa cu varios incidente tragico unda, na San Nicolas den cercania di Springfield Supermarket debi na candela, cas completo y nan inboedel a keda totalmente destrui. Varios famia a mira con, den un rato, nan cas y nan pertenencia a bay na candela.

   Minister President Mike Eman personalmente a bay bishita e famianan afecta, scucha nan experiencia y compronde nan situacion di cerca. Durante e bishitanan aki, compasion y solidaridad tabata central, pero tambe e buskeda di solucionnan concreto.

   Hunto cu e Ministro di Asuntonan Social, Mervin Wyatt Ras, a cuminsa inmediatamente cu e coordinacion di ayudo di emergencia y regla cas pa e famianan afecta. Ademas, ta traha riba otro forma di sosten adicional pa yuda e famianan pasa e periodo dificil aki.

   Minister-President Eman a enfatisa e importancia di cercania y solidaridad den momentonan di necesidad y a declara:“Esaki ta momentonan hopi impactante pa e famianan aki. Hustamente aworaki nos mester ta cerca di otro, como comunidad, y pone nos schoudernan hunto.”

   Gobierno lo sigui e desaroyonan di cerca y lo sigui compromete su mes pa, hunto cu e instancianan concerni, duna sosten adecua na e famianan afecta.