Minister Oduber hunto cu Minister Kuipers a bishita Texas Medical Center Innovation

Nan kier sigui e combersacionnan di colaboracion entre TMC, Hulanda y Aruba

ORANJESTAD (AAN)/HOUSTON - Minister Oduber durante su estadia na Houston hunto cu minister Kuipers di salud a bishita TMC (Texas Medical Center) Innovation Institute. Esaki por wordo considera manera e compania “Google” den cuido medico. Tabata un bishita impresionante caminda nos a experiencia e futuro den cuido, caminda innovacion y tecnologia ta central.

            Minister Oduber a haya un oportunidad pa conoce Billy Cohn, cu ta e director di Johnson & Johnson's Center for Device Innovation na Texas Medical Center.

            Ministernan Oduber y Kuipers a ricibi un rondleiding pa conoce mas kico tur ta wordo haci na e institucion aki.

            Loke nan ta haci na e instituto aki, ta diseña tur loke no ta existi pa mehora cuido usando innovacion y tecnologia. Simplemente algo cu bo no por ni imagina.

            Billy Cohn a presenta durante e recorido un curason artificial cu por reemplaza henter un curason humano. E ta den periodo di prueba y otro aña 2023 lo haci e prome operacion riba un ser humano. Nan ta spera di por scapa miyones di bida humano usando e metodo aki.

            E instituto aki tambe ta traha cu diferente otro compania den e ramo di salud medico cu ta interesa pa coopera globalmente pa incorpora innovacion den diferente tratamento. Un experiencia inolvidabel pa por tabata presente na TMC. Bunita di esaki tabata cu nan kier sigui e combersacionnan di colaboracion entre TMC, Hulanda y Aruba.

            Loke tin na innovacion por medio di tecnologia ta increibel. Tabata hopi impresionante pa haya tur e informacion di loke ta pasando den e mundo di tecnologia den cuido medico.