Minister Maduro ta felicita tur participante y ganadonan di e Festival Infantil y Hubenil di Dande  

ORANJESTAD (AAN):  Diahuebs dia 28 di december ultimo Minister di Cultura tabata presente na Centro di Bario Tanki Lender pa felicita

y gradici tur e participantenan di e Festival Infantil y Hubenil di Dande organisa pa Comision Promove Cultura.

          Un total di 13 participante den 3 categoria di edad, a subi tarima pa deleita e publico cu e musica di Dande cu ta nos folklore y tradicion di Fin di Aña. Cada un di nan a duna un bunita presentacion, a canta e Dande cu hopi pasion y tabata un ganador riba nan mes.

          Sinembargo den cada categoria a brinda un premio pa esun cu a resalta mas. Rey di Dande 7 pa 9 aña ta Jaymerson Kelly, Reina di Dande 10 pa 12 aña ta Lizziene Webb y Reina di Dande 13 pa 17 aña ta Stephany Quandt.

          Minister Maduro tabata tin e honor e placer di por a corona tur e ganadonan y felicita nan pa nan bunita aporte na Cultura di nos Pais.

          E mandatario ta gradici tur e agrupacionnan cu a compaña e hobennan. Palabra di gratitud tambe ta bay pa Comision Promove Cultura, Comision Celebracion Dianan Nacional, Setar y tur instancia y persona cu ta aporta pa asina por organisa e festival di Dande Infantil y Hubenil cu ta brinda nos hobennan y Pueblo en general e oportunidad pa nos biba nos Cultura di Fin di Aña. Masha danki y Ay Nobe!