Minister Maduro a combersa cu artista 'Caleto' riba su proyectonan pa conserva e musica di Aruba

ORANJESTAD (AAN):  Recientemente Minister Maduro a combersa cu e artista Ivan alias Caleto di Worldbeat Records Aruba pa haya sa mas di e proyectonan nobo cu e ta trahando riba nan.

Ivan ta haciendo un trabou hopi bunita pa documenta y conserva e musica di Aruba y Caribe.

            Cas pa cas Ivan ta pasa pa asina busca informacion riba e musica cu a yega ta rezona antes den nos casnan na Aruba. E bunita ta cu Ivan ta conserva e piesanan aki door di hinca nan den un bachi moderno pa asina e hobennan tambe por cera conoci cu e musica cu ta forma parti di nos cultura.

            Aña pasa mes Ivan a compila e musica di Cah'i Orgel di sr. Buchi Boekhoudt y a haci esaki accesibel via un album vinyl y memory stick.

            Ivan a presenta esaki durante un atardi musical teni na Aruba Experience na unda musica di Cah'i Orgel a resona.

            Minister Maduro ta spera di pronto por mira mas produccion di Ivan alias Caleto di Worldbeat Records Aruba. Danki Ivan pa kere den Aruba.