ORANJESTAD (AAN): Minister di Defensa di Hulanda Ruben Brekelmans, kende desde 2 di Juli di 2024 a drenta e funcion, ta di bishita na Aruba.
Den un entrevista na Marinierskazerne Diaranzon, e minister Hulandes a splica cu el a bishita e militarnan, despues di cual su intencion ta pa papia cu Gobernador, minister di Husticia y Prome Minister.
“Naturalmente mi ta bay papia tambe riba e cooperacion entre Hulanda y Aruba y e menazanan mundial cu tin, como tambe e tensionnan geopolitico”.
Tambe nos lo papia riba e trabaonan importante cu nos ta haci riba e tereno di traficacion di droga, trafico humano y e asistencia militar cu nos ta provee aki, cu ta tareanan hopi importante, segun Brekelmans.
El a splica cu anteriormente el a bishita Corsow y ainda e tin cu pasa St. Maarten.
A puntra e mandatario Hulandes con e relacion entre Hulanda y Aruba y el a bisa cu e ta bon, si bo wak specialmente e hecho cu pa varios aña Hulanda ta presente na Aruba via e kazerne entre otro.
“Nos ta brinda asistencia tambe unda nos por incluyendo via Kustwacht, den e bataya contra traficacion di droga y trafico humano”.
Locual a impresiona mi sigur ta e cantidad di droga cu ta wordo intercepta, segun Brekelmans.
El a bisa tambe cu e hecho criminalnan ta purba trafica asina tanto droga ta preocupante.
“Ta netamente door cu nos ta traha asina bon cu otro, nos ta logra intercepta asina tanto droga”, segun e mandatario.
Pa loke ta e parti financiero di e ministerio di Defensa, Brekelmans a splica cu Hulanda ta inverti 3 biyon euro mas pa por cumpli cu e norma di 2% di NATO.
“Den esaki nos ta wak kico nos tin mester di dje pa por ehempel defende nos mes contra Rusia, pero nos ta wak tambe kico ta necesario pa por proteha henter e Reino”.
Pesey nos ta inverti extra den Marina, pues nos ta cumpra barconan nobo cu lo wordo uza den Caribe.
Banda di esey specificamente nos ta inverti 12 miyon euro den defensa aereo y medionan contra drones.
Esaki segun Brekelmans, kende a indica cu esaki ta conta tambe pa e islanan di Caribe, mirando cu tensionnan den e region a aumenta.
