Laura Luces di Fundacion Gloria al Bravo Pueblo:
ORANJESTAD (AAN) — E integrantenan di Fundacion Gloria al Bravo Pueblo, Laura Luces y Yenny Castro, den entrevista cu DIARIO a elabora tocante e yamada cu nan a ricibi di nan lider Maria Corina Machado, y e Presidente Electo di Venezuela Edmundo Gonzalez Urrutia, pa for di dia 5 di januari nan cuminza keinta e caminda, no solamente na Venezuela pero na nivel mundial.
“Pa tur Venezolano manifesta nos mes, den nos apoyo na e presidencia nobo y pa bisa Maduro y e criminalnan cu ta acompañ’e cu ya su tempo a agota! Ya basta, nos kier un Venezuela liber y prospero!” Laura Luces a declara.
El a menciona cu Presidente Gonzalez no ta na Spaña mas, e tabata na Uruguay, ademas el a haci un breve escala na Panama y Merca, y posiblemente na Costa Rica y Santo Domingo tambe.
“No ta bay ta facil pero nos ta spera cu nan compronde cu nan tempo a agota!” Luces a reitera.
El a splica cu segun e Constitucion di Venezuela, Dia 10 di Januari, den e Asamblea Nacional si esey ta posibel, e candidato cu a gana e eleccionnan presidencial mester wordo proclama Presidente di e Republica. “Nos tin mas di 85% di e Actanan cu ta revela cu Edmundo Gonzalez a gana eleccion di manera ireversibel, por mas di 4 miyon voto, contra Maduro”, e dama a subraya.
Laura Luces a declara cu a partir di dia 10 di januari Nicolas Maduro ta e dictador di Venezuela, pasobra e Presidente Electo ta señor Edmundo Gonzalez Urrutia.
