ORANJESTAD (AAN): Durante un conferencia di prensa di Minister Glenbert Croes,
prensa a puntra e mandatario tocante e situacion di coriente na Aruba, mirando cu parce cu tur dia un caminda na Aruba coriente ta bay.
Riba Facebook casi tur dia bo por lesa reclamo di hendenan cu ta keda sin coriente pa tin biaha algun ora pa dia.
Pesey a puntra Croes kico e como minister di Energia tin pensa di haci pa purba resolve e problema.
Croes a indica cu e ta bay reuni cu Elmar y WEB entre otro pa wak kico por ta un solucion.
“Mi a instrui director di Utilities y su team pa hunto cu e team di WEB y Elmar pa nan bin cu un solucion pa Aruba den e proximo 30 dianan aki, pasobra cu mirando e inversionnan grandi haci y e prijs cu comunidad ta paga pa awa y coriente, no por ta posibel den e mundo moderno aki, cu tin asina tanto biaha cu coriente ta bay”.
Esaki ta inaceptable den e mundo moderno aki, unda cu suministro di coriente mester ta confiable, segun e mandatario.
Croes a sigui bisa cu si e red di coriente no ta confiable, esnan encarga mester laga sa si por ehempel tin mester di mihor mantenimento of material.
“Den un mundo cu ta birando mas calor, nos pueblo tin mester di e frieu di airco den nos cas”.
Ora cu coriente bay bo ta paraliza un pais.
Si e bay den un bario bo a paraliza e bario, sin conta e calor y molester cu e ta trece cune, cu pa nos ta algo inaceptable.
Nos ta spera den e proximo 30 dianan nan bin cu un plan di solucion pa nos cuminza cune.
Nan ta NV-nan di Gobierno cu tin e agilidad y facilidadnan financiero di por actua pa drecha locual ta malo y nos kier sinti cu ora cu e cosnan aki tuma lugar, nos NV-nan di Gobierno ta asumi responsabilidad y actua di biaha, segun Croes kende a indica cu di biaha nan tin cu duna comunidad cara.
