Dia 1 di September:
ORANJESTAD (AAN) – Director di Departamento di Transporte Publico (DTP), señor Theo Kock, den entrevista cu DIARIO a splica cu desde entrante 1 di September, a drenta na vigor un Decreto Ministerial, relaciona cu e forma di bisti di e chauffeurnan cu ta traha den transporte publico.
E ta bisa cu esnan cu ta traha den transporte publico mester “zindelijk” great.
Kock ta comenta cu “zindelijk” ta un palabra cu cada persona ta interpreta na su manera, y esaki ta haci cu cada aña tabata tin discusion, vooral ora cu DTP tin control y para un chauffeur cu, den nan bista, no ta bisti na un manera corecto, nan a cuestiona con e departamento ta interprete y con e doño di e vergunning ta interprete. El a bira un bay bin di discusionnan cada aña, anto director di DTP mes a manda un sugerencia pa e minister, ken a acepte y adapt’ e na su maneho. El a duna un descripcion di con cada persona mester por bisti ora nan ta ehecuta un di e tareanan cu ta stipula den e landsverordening di esnan cu ta traha den transporte publico, por ehemplo un chauffeur di taxi of un chauffeur di autobus.
Un grupo di chauffeur di taxi y di autobus a sinta cu e minister, y nan ta pasa e informacion pa esnan cu no tabata presente. DTP ta bezig ta manda email pa cada un doño di vergunning, maske esaki ta hopi trabao.
Taxista mester bisti cu carson largo cu no ta kibra, camisa cu manga, zapato cera, pues no manera ta gym nan ta bay, y esaki tin su motibo como cu e ta duna servicio na turistanan, cu hopi biaha ta bin cu nan famia y nan ta pagando pa un servicio, pues nan mester ta bon representa.
No ta trata aki di un uniform sino un peticion pa nan bisti na un manera adecua. Taxistanan femenino tambe mester bisti na un forma adecua, cu carzon largo, blusa y zapato cera y safe y comodo pasobra nan tambe tin cu lanta maleta pa e turistanan. Lo tin amonestacion pa esnan cu no cumpli.
Pa loke ta trata chauffeurnan di autobus, awendia tur ta bisti nechi caba, y nan a yega na un acuerdo cu minister ya cu no tur tin airco den e autobus y mester por bisti un poco mas flexible.
