ORANJESTAD (AAN) – Minister Glenbert Croes, a a reuni tambe cu representantenan di e Embahada di Ecuador, atravez di canalnan diplomatico, cu apoyo di e Embahada di Hulanda na Washington.
“Esfuerzonan ta wordo haci pa Gobierno di Ecuador, atravez di nan Compania Nacional di Petroleo, “Petro-Ecuador”, si nan por ricibi nos y considera Aruba como un pais cu cual nan por bende ‘heavy fuel oil’. Nos ta coordinando di gobierno pa gobierno, Estado pa Estado, di Compania di Gobierno di Aruba pa Compania di Gobieno na Ecuador. Di con? Pasobra ora bo ta un compania priva cu doñonan priva tin un procedimento, y ora bo ta un compania di Gobierno di Aruba, obviamente nan ta trata bo cu consideracion y pesey mes na nivel gubernamental, e dos ministernan, den e caso aki mi persona y mi colega di Ecuador lo cuminza na nivel gubernamental, delibera riba e formanan di cooperacion cu nos por yena na dje, specificamente riba loke ta e necesidad pa FMSA por cumpra, mientras tanto cu nos ta wardando respuesta di Gobierno Mericano, e dignatario a duna di conoce.
Minister Croes a splica cu e diferencia entre cumpra un producto di origen Venezolano vs un producto di Ecuador lo ta e prijs. E descuento, probablemente debi na e distancia, ta mustra cu esun di Venezuela ta mas atractivo pa WEB Aruba NV.
En todo caso, e chens pa haya e producto Venezolano pa baha prijs di awa y coriente na Aruba, lo ta mas interesante, pero un bon alternativa, mientras tanto, definitivamente ta Ecuador.
“Y nos tin respet pa Ecuador, un pais Latinoamericano ruman, na Aruba nos tin residentenan Ecuatoriano, y finalmente por bisa cu hunto, apesar cu Ecuador ta un pais relativamente chikito den e hemisferio aki, por ta door di esey nos lo por compronde otro miho, y esey nos a sintie ora cu hunto cu Joselyn Croes nos a reuni cu representantenan di e Embahada di Ecuador”, e dignatario a expresa. E mandatario a reitera su gratitud cu nan, pa nan consideracion.
El a agrega cu aworaki entre e Embahada di Hulanda na Ecuador y Gobierno di Ecuador, ta wordo coordina e prome reunion, pasobra en realidad pa e dolor cu gobierno ta sinti den nos comunidad, y cu henter e pueblo tin pa e prijs di awa y coriente, si por alivia e pueblo cu un prijs mas barata e lo yuda enormemente, por lo cual gobierno mester actua cu urgencia pa logra un acuerdo, sea cu Venezuela of cu Ecuador.
