Minister Glenbert Croes cu palabranan bunita y emotivo pa graduadonan di SVT

ORANJESTAD (AAN) – Minister di Asunto Social, Glenbert Croes (bao cual e Proyecto Formacion Social ta resorta),

en conexion cu e entrega di certificado na e 20 muchanan homber cu a pasa e prome fase di e trayecto cu exito, a expresa durante e ceremonia cu e ta hopi orguyoso di e hobennan aki.

E mandatario a expresa cu ta manera un piedra cu tur hende ta pone, riba e base di un fundeshi solido, riba nan mesun bida.

El a gradici Captain Kelly, Sargento Thiel y henter e team di Arumil y henter e staf di “Sociaal Vorming Traject”.

Ademas, e mandatario a gradici tur e sosten ricibi di Gobierno di Hulanda, atravez di Marina di Defensa Hulandes.

El a gradici e mayornan cu a dicidi di interveni den e bida di nan yiunan pa, kizas, pusha nan pa forma parti di Formacion Social, como tambe e hobennan cu di nan mesun iniciativa nan a bisa nan mayornan cu nan kier drenta den e proyecto aki.

E mandatario a reitera cu e aña aki a habri e posibilidad di Formacion Muher pa mucha muher tambe, unda cu el a haya e bon noticia cu di 30 peticion, entre 20 cu 25 lo drenta den e prome klas.

Minister Glenbert Croes a considera importante pa bisa e hobennan cu, cu nan trayecto tabata algo increible, y aworaki Aruba ta ehemplo den Reino, y Captain Kelly a informe cu e ta bayendo Corsow y Sint Maarten, cu kier sigui ehemplo di Aruba. “Boso ta testimonio di e pakico nos mester sigui inverti den e futuro di nos hobennan. Un lema cu mi a gusta masha hopi mes ta e lema cu boso tin riba e look di SVT: ‘Power up for Glory’. Boso ta bay ‘power up for Glory’ boso futuro, boso bida, y lo mas importante, mi ta kere, pa e hobennan cu a gradua y cu awe a haya nan certificado, ta cu boso mayornan ta kere den boso. Boso ta kere den boso, nos ta kere den boso.

Un cos cu mi kier pa boso ta, cu Aruba mester di boso tur y cada un, awe mas cu nunca”, e dignatario a expresa.

El a sigui bisa cu historia di bida ta, un historia di cay, lanta, bolbe cay, pero ta importante pa semper lanta bek. El a dirigi e palabranan aki na un hoben cu no a logra, pa e tuma e oportunidad di drenta den e siguiente klas y el a pidi e hoben y su mayornan pa no “give up”.