ORANJESTAD (AAN): Den su prome 100 dia di gobernacion, Minister di Relacionnan den Reino, Educacion, Hubentud, Innovacion y Deporte,
mr.Gerlien Croes, a pone e fundamentonan pa reformanan significativo y duradero den tur area di su amplio ministerio.
Guia pa transparencia, innovacion y sostenibilidad, Minister Croes a acelera proyectonan crucial den relacionnan den reino, educacion, hubentud, innovacion y deporte — demostrando resultado concreto y un vision cla pa futuro di Aruba.
Den su rol como Minister di Relacionnan den Reino, Minister Gerlien Croes a tuma pasonan concreto y strategico cu ta enfoca riba fortalece cooperacion den reino y cu Europa, reforsa posicion huridico y institucional di Aruba, y habri porta pa desaroyo sostenibel. A continua debidamento cu e proceso di Rijkswet, a inicia cooperacion structural cu BZK y a establece laso riba nivel municipal y ministerial na Hulanda pa traha riba bienestar di hubentud y desaroyo deportivo. Tambe a tuma liderato den un estudio conhunto cu Hulanda y islanan bisiña riba e futuro di Aruba y su lasonan cu Union Europeo. A sigura e renobacion tan desea di Arubahuis na Den Haag, despues di tres aña di abandono y lagando esaki den un condicion deplorabel, ta un simbolo di compromiso pa recuperacion, dignidad y accion efectivo den relacionnan den Reino. Un edificio historico cu ta simbolisa orguyo di Aruba den Reino.
Riba tereno di educacion, a enfrenta retonan importante cu determinacion, instalando un comision ‘Salariering Docenten’ pa traha un maneho financiero responsabel pa un mihor compensacion pa docente, relaciona cu profesionalisacion. A lansa un plan pa mehora cuido pa alumno y condicion den klasnan, a inverti den formacion y hermentanan moderno pa trece mas eficiencia den apoyo pa studiante, y a sigura fondo pa proyecto cu ta enfoca riba mehoracion di calidad y alfabetisacion den Papiamento y Hulandes. Ademas, a fortalece e conexion entre mercado laboral y enseñansa por medio di Plataforma Educacion y Labor, y a duna inicio na plan di modernisacion pa scolnan publico, incluso renobacion di Scol Reina Beatrix y inventarisacion di e infrastructura di tur nos scolnan na Aruba
Minister Croes tambe a tuma paso firme pa fortalece cuido pa hubentud door di lansa colaboracion cu centro di experticio Hulandes den cuido di hoben, cuminsa preparacion pa un jeugdbeleid integral pa Aruba. Na nivel di enseñansa superior, minister Gerlien Croes a explora maneranan concreto pa studiante haya mihor oportunidadnan pa studia den exterior y a inicia un campaña pa apoya studiante cu ta bai studia na Hulanda den nan periodo di transicion mientras lo introduci mas restructuracion.
Den deporte, Minister Gerlien Croes a revitalisa posicion internacional di Aruba y ta trahando riba sigura e regreso di Aruba su participacion na e prestigioso weganan CONCECADE. Minister a confirma continuacion di proyecto pa instala luz LED na varios veld, (RCA, Riverplate y Nacional) y a sigura apoyo di World Aquatics pa un inversion den un warm-up pool na Piscina Olimpico Roly Bisslik. Tambe a lansa plan di mantencion y mehoracion di nos veldnan deportivo den colaboracion cu DOW. Door di coordinacion internacional, tambe a cuminsa traha riba structura un proceso pa purba crea mas oportunidad di beca pa nos atletanan talentoso. Demonstrando su compromiso pa empodera hubentud Arubano por medio di deporte y educacion.
Ademas di esakinan, a pone atencion special riba innovacion y transformacion digital como e motor pa progreso y a reanuda e accionan cu a keda pendiente pa basta aña pa cu e transicion den e-government. A crea un Digital Transformation Taskforce pa garantisa un strategia digital integral, y a inicia trabounan pa simplifica proceso gubernamental pa ciudadanonan, por medio di implementacion di Digital ID y firma digital. Tur esaki ta muestra cu tin un plan, tin vision y tin boluntad pa duna resultado concreto cu ta beneficia comunidad. Danki na pueblo pa e confiansa y nos lo sigui traha pa un miho futuro pa Aruba.
