Na apertura di Oficina Studio y EducationUSA:
ORANJESTAD (AAN) Durante e apertura di e Oficina Studio y EducationUSA, Minister di Enseñanza, Hubentud, Innovacion y Deporte, a hiba palabra y a elabora tocante con e proyecto aki a surgi, y cual ta su meta, como un iniciativa propio.
E mandatario a cuminza bisando cu algun luna atras durante cu el a haci su entrada como minister, un di e prome reunionnan cu el a tene, tabata cu nos studiantenan na Hulanda. Esaki tabata den luna di Juni 2025.
“Durante mi bishita, nos a haci un yamada na nos studiantenan Arubiano, pa nos sinta hunto y combersa riba nan trayecto na Hulanda, e escogencia cu nan ta, of a, haci di nan estudio, pero tambe con nos por duna nan miho sosten. Hopi lihe, na momento ey cu mi tabata den combersacion cu nos studiantenan, mi a corda di e temporada cu ami mes scoge pa bay biba y studia afo.Y mi a reconoce hopi di loke nan tabata comparti cu mi persona. E hecho cu no semper tur e informacion ta conoci cerca nan localmente, di kico tur e posibilidadnan cu tin ora nan a habri hala bay afo. Ta hopi bez, ora cu nan yega na e pais no solamente nan ta siña conoce con e pais ta funciona, pero tambe nan ta haya mas informacion di cuanto oportunidad mas tin, cu nan no tabata sa di dje”, minister Gerlien Croes a relata.
El a agrega cu no ta solamente esey, pero riba e proceso tambe pa yega na e destinacion, ta un proceso pisa y largo.
E dignatario a subraya cu ora e studiantenan tey nan hopi bez nan no sa con y ken nan por contact, mi a sinti na e momentonan ey, cu nos falta un centro cu, vooral awendia, por wordo comunica na e forma cu ta atrae nos hobennan.
“E realidad ta cu nos tin nos Departamento Directie Onderwijs, cu pa añas, ta cargando e responsabilidad aki, pero alavez nos sa cu si por duna un aporte na unda cu e informacion ta hopi accesibel y cu tin un centro unda nan por yega diariamente y cu nan por haya guia tambe fisicamente. Kizas esaki lo por cuminza facilita nan”, minister Gerlien Croes a señala.
E dignatario a sigui splica cu, hopi lihe, aña pasa el a inicia, riba termino corto, un proyecto yama “Ban studia”, riba e plataformanan social. El a bisa cu esnan cu ta activo riba dos red social hopi popular, kizas por a tuma nota cu tabata tin hopi video mes, cu tabata duna hopi guia y informacion na nos hobennan y specialmente esakinan tabata destina na esnan cu ta bay Hulanda.
