Minister Geoffrey Wever tabata tin un siman basta fructifero cu diferente reunion

ORANJESTAD (AAN): Durante siman cu a pasa Minister Mr. Geoffrey Wever a bishita diferente departamento y compania estatal cu ta cai bow Minister Wever su Ministerio.

            A bishita Camera di Comercio unda Minister a sinta cu board y a intercambia idea con pa entre otro cuminsa elimina e fenomeno di “red tape”, esta proceduranan administrativo, cu ta hopi burocratico y costoso y cu tin impacto negativo riba e hacimento di negoshi na Aruba. E meta principal ta pa bin cu un sistema a base di cual por haci negoshi na un forma mas eficiente y dinamico. “Pronto mi lo elabora mas riba e topico aki y cuminsa comparti e manera con nos lo soluciona e problematica aki”.

            Tambe a bishita SER (Sociaal Economishe Raad) unda a sera conoci cu algemeen secretaris sr. Felix Bijlhout y e Secretariaat . Aki entre otro a splica Minister kico  e tarea di  SER ta y a informa Minister cu SER tey pa aconseha gobierno especialmente riba topiconan socio economico.

            A bishita Bureau Intellectueel Eigendom pa haci conoci cu su directeur Sr. Kelly y nan team y a haya un splicacion amplio di locual Bureau Intellectueel Eigendom ta haci. “A resalta di biaha cu Bureau Intellectueel Eigendom tin un potencial grandi y mester dedica tempo y resources pa optimaliza e bureau aki y hisa entrada pa Pais Aruba”, segun Minister Wever.

            Por ultimo a bishita Postkantoor un dia promer cu e dia International di Post unda a felicita e team di Post Aruba. Despues Minister a haya un rond leiding y a sinta cu directiva di Post Aruba N.V. “Post Aruba N.V. tambe ta un compania estatal cu tin un potencial grandi, especialmente riba e tereno di e-commerce, den combinacion cu Aruba su ubicacion geografico y Freezone Aruba N.V., e potencial di un cargo hub ta bira ainda mas interesante. Mi lo sigur bay dedica hopi atencion na e potencial aki e proximo añanan”, segun Minister Wever.

            “E siman aki tabata un siman sigur fructifero. Mi por a haya un bista amplio di diferente instancianan cu ta cai bow mi Ministerio,” Minister Wever a cuminsa ta bisa, “Mi ta contento di a haci esaki y intercambia idea nan di con por mehora y optimaliza e instancianan aki, y hasta tin posibilidad pa hisa entrada di gobierno y desaroya pilarnan economico nobo.

             Locual tambe a resalta ta cu e directiva y personal di e instancianan aki a demostra den e encuentronan aki cu nan kier traha hunto cu Gobierno pa yuda pusha nos economia y ta motiva y a ofrece tur ayudo na mi.” Minister Mr. Geoffrey Wever a termina ta bisa.