Minister Geoffrey Wever ta gradici Staatssecretaris Szabó pa su bishita

ORANJESTAD (AAN):  Minister di Finansa, Asunto Economico y Sector Primario, Geoffrey Wever,

a expresa su agradecimento na Staatssecretaris Sr. Zsolt Szabó (Digitalisacion y Relacionnan di Reino) pa su bishita oficial na Aruba. Durante su bishita, Sr. Szabó a presencia e inauguracion di e edificio nobo di Pro-Tec Aruba N.V., situa na Sero Blanco 14-A.

            E acto di apertura a tuma luga diamars merdia y tabata inclui un ceremonia oficial cu participacion di señor Henk Willem Van Dorp, staatssecretaris Szabó y minister Wever. E evento a sigui cu presentacion pa señor Van Dorp riba tema: “Oportunidadnan di innovacion sostenibel pa sector priva den Reino Caribense”, como tambe un presentacion dirigi pa Sr. Vincent Storimans, representante di Hulanda na Aruba (VNO).

            Pro-Tec Aruba N.V. a wordo tuma over na 2022 pa e empresa Van Dorp, un empresa familiar Hulandes cu mas di 2.600 empleado y 30 oficina—28 na Hulanda, 1 na Aruba y 1 na Boneiro. Na Aruba Pro-Tec ta emplea 108 hende y su trabou ta enfoca riba instalacion tecnico, sistema di energia y climatisacion.

            Minister Geoffrey Wever a saluda e esfuerzo di Van Dorp pa fortalece su presencia riba nos isla y a pone enfasis riba importancia di innovacion y confianza den mercado Arubiano.

            “Aruba tin mester di mas innovacion den nos industrianan, y inversionnan cuantioso manera esun di Van Dorp ta di aplaudi. Nos mester crea un clima pa negoshi y desaroyo, pa motiva mas empresarionan pa kere den Aruba y traha pa progreso real,” minister Wever a expresa.

            Minister Wever tambe a gradici staatssecretaris Szabó pa su compromiso continuo pa fortalece lazo di cooperacion entre Hulanda y Aruba y pa siña con un vision pa futuro por uni e Reino den desaroyo sostenibel y digital.

            E ministerio di finansa, asunto economico y sector primario ta compromete pa sigui crea espacio pa progreso, confianza y innovacion, pa un Aruba mas economicamente fuerte y sostenibel.