ORANJESTAD (AAN): Dialuna 2 di november, Minister di Finansa, Asunto Economico y Sector Primario,
Geoffrey Wever, a duna un gascollege na Instituto Pedagogico Arubano (IPA), caminda e la comparti cu futuro maestronan di Aruba e vision y maneho di Gobierno pa fortalece economia, mantene finansa publico solido y stimula un desaroyo sostenibel di nos pais.
E presentacion, cu tema “Geïntegreerd beleid, van visie naar resultaat”, tabata enfoca riba e importancia di un maneho integral, caminda finansa publico, desaroyo economico y sector primario ta complementa otro. Minister Wever a splica con Gobierno ta traduci e prioridadnan di Programa di Gobernacion 2025–2028 den planificacion, accion y proyectonan concreto cu tin como meta mehora calidad di bida di pueblo di Aruba.
Durante e gascollege, minister a duna un bista di e desaroyonan economico y financiero di Aruba, e importancia di un maneho fiscal responsabel y e inversionnan strategico cu Gobierno ta prepara pa futuro. Tambe e la destaca iniciativanan pa diversifica economia, stimula comercio local y fortalece siguridad alimentario, incluyendo e desaroyo di sector agricola.
Un punto importante di e presentacion tabata e necesidad di continuidad den maneho di Gobierno, colaboracion entre diferente sector y planificacion a largo plaso pa transforma vision den resultado concreto.
“Desaroyo di un pais no ta depende solamente di bon plan y recurso financiero, pero tambe di e conocemento y capacidad di su pueblo. Educacion ta un inversion esencial den futuro di Aruba. E maestronan di mañan lo tin un papel fundamental den prepara e proximo generacion pa contribui na progreso di nos pais,” Minister Wever a expresa.
Minister Wever a gradici IPA pa e invitacion y e oportunidad di comparti su vision cu e futuro profesionalnan di enseñansa. Segun minister, intercambio di conocemento entre Gobierno y institucionnan educativo ta importante pa crea mas comprension di e decisionnan y responsabilidadnan cu ta determina futuro di Aruba.
