“Economic Outlook November 2025- 2027”
ORANJESTAD (AAN): Riba Diahuebs, Minister di Finansa, Asunto Economico y Sector Primario Geoffrey Wever a presenta e “Economic Outlook November 2025- 2027” di Departamento di Asuntonan Economico, Comercio y Industria (DEACI). E “Economic Outlook 2025- 2027” ta contene un ahustacion di e crecemento economico pa 2025 y ta duna un proyeccion pa 2026 y 2027 cu ta basa riba informacion te cu prome di oktober riba nos economia.
“Economic Outlook November 2025- 2027” ta mustra cu Aruba su economia den 2025 ta premira pa crece mas cu a worde proyecta den e luna di mei. DEACI ta haci un ahustacion di 3.9 porciento pa 5.9 porciento pa e crecemento di Aruba su economia pa 2025 den termino nominal pa yega na un balor di e producto interno bruto di 7.8 miljard Florin, e indicador pa midi actividad economico.
Pa 2026 e expectativa ta positivo pa e desaroyo economico di Aruba. DEACI ta premira un crecemento nominal di 2.6 porciento den 2026 cu un balor pa e producto interno bruto di 8.0 miljard Florin. Pa 2027 DEACI ta premira cu Aruba su economia lo sigui crece cu 1.9 porciento pa yega na un balor di 8.2 miljard Florin den termino nominal.
E expansion di actividadnan economico pa 2025 ta basa riba crecemento di turista cu ta bishita nos isla y crecemento di consumo empuha pa e adaptacion di e tarifa di inkomstenbelasting di 10 pa 0 porciento, e subida di reparatietoeslag cu 250 Florin tur luna na pensionadonan desde 1 di mei 2025. E revision di proyeccion di crecemento di economia di Aruba ta den liña cu e proyeccion di Banco Central di Aruba y Fondo Monetario International. Banco Central di Aruba den su economic outlook di november 2025 ta premira pa 2025 y 2026 un crecemento economico di respectivamente 6.2 porciento y 3.3 porciento den termino nominal. Segun e world economic outlook april 2025 , Fondo Monetario International ta premira pa 2025 y 2026 un crecemento economico di respectivamente 3.7 porciento y 4.5 porciento den termino nominal.
Pa facilita proyeccion di e economia di Aruba, DEACI ta haci uzo di e modelo macro-economico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba. Maneho di e modelo MARUBA ta cay bao responsabilidad di DEACI. E proyeccionnan economico ta posibel danki na e dialogo continuo cu diferente instancianan y expertonan local, y a base di analisis di diferente desaroyo.
Analisis tur luna di entradanan di belasting ricibi na entre otro BBO y invoerrechten tabata duna un panorama cu Aruba su economia ta creciendo miho cu 2024. Awe DEACI den cooperacion cu demas expertonan cu ta forma parti di e Comision MacroModel ta confirma cu pa 2025 nos economia lo crece cu 5.6 porciento compara cu 2024 segun minister Geoffrey Wever.
Ministerio di Finansa, Asunto Economico, y Sector Primario conhuntamento cu Departamento di Asuntonan Economico, Comercio y Industria lo sigui monitor desaroyo di economia di Aruba.
Minister Geoffrey Wever kier gradici directora Maria Dijkhoff- Pita y e afdeling Economisch Beleid en Onderzoek hunto cu Comision MacroModel cu ta haci e economic outlook posibel. Pa mas informacion riba e “Economic Outlook November 2025- 2027” por bishita website di DEACI: www.deaci.aw
