ORANJESTAD (AAN): Diaranson 14 di februari Minister Geoffrey Wever hunto cu e Comision Combati Economia Informal
a presenta na Parlamento di Aruba e “National Action Plan for Formalizing the Shadow Economy in Aruba.”
Na 2022 investigacion di Professor Schneider hunto cu Sr. Jason Lejuez di Departamento di Asuntonan Economico, Comercio y Industria (DEACI), a conclui cu e balor di actividadnan economico den e sector informal ta representa un promedio di 20% di e producto interno bruto (GDP) di Aruba.
Economia informal ta actividadnan economico cu simplemente bisa "no ta cumpli cu leynan existente". Esaki ta encera entre otro no ta inscribi na Camara di Comercio, no tin permiso pa haci negoshi y no ta registra na Departamento di Impuesto. Esaki ta nifica cu esnan activo den e sector informal no tin e gastonan cu esnan cu si ta cumpli cu leynan. Esaki ta crea un situacion di competencia inhusto pa companianan cu si, na e manera corecto, ta cumpli cu nos leynan.
Riba peticion di minister Geoffrey Wever, conseho di minister a duna su aprobacion pa instala un comision pa traha un plan nacional pa combati e economia informal na Aruba. E comision a wordo instala riba 10 di mei 2023 y ta consisti di representantenan di DEACI, Departamento di Impuesto (DIMP), Directie Arbeid en Onderzoek (DAO), Sociale Verzekeringsbank (SVB) y Aruba Trade and Industry Association (ATIA).
Diaranson plan nacional a keda presenta den Parlamento di Aruba. E Programa Nacional ta contene diferente accionnan pa formalisa e economia informal na Aruba pa e periodo 2024- 2027. Trabao di e comision lo sigui enfoca riba implementa e diferente accionnan pa cada aña.
Minister Geoffrey Wever kier a gradici e Comision Combati Economia Informal pa a traha e plan nacional aki y tambe kier a gradici e miembronan di parlamento pa un reunion profesional y interactivo.
