Registracion ta gratis
* Na Aruba 3 di 10 hogar ta gasta mas di nan entrada tur luna
ORANJESTAD (AAN): Minister di Asuntonan Economico, Comunicacion y Desaroyo Sostenibel, Geoffrey Wever a anuncia cu pronto lo start di e segundo edicion di e proyecto Finansa den mi Hogar. Meta di e proyecto ta pa nos hendenan ricibi guia y conocemento cu por yuda tuma decisionan financiero cu ta beneficia su bienestar.
Despues cu 316 ciudadano a ricibi nan certificado durante e prome edicion den e diferente districtonan di Aruba, e segundo edicion di Finansa den mi Hogar lo start pa asina sigui duna guia- y conocemento na nos ciudadanonan riba con pa maneha nan cartera. Mescos cu e prome edicion, Minister Geoffrey Wever ta facilita e curso pa esaki por ta completamente gratis.
Na Aruba 3 di 10 hogar ta gasta mas di nan entrada tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa hogarnan cumpli cu tur necesidad y responsabilidadnan financiero manera entre gasto pa vivienda, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar.
E proyecto Finansa den mi Hogar a wordo desaroya door di Fundacion Plan di Bida y tin como mision pa trece conscientisacion den nos comunidad, ofreciendo ayudo y guia mustrando e manera pa maneha nos finansa mas efectivo. Lo ofrece e curso como apoyo na nos hendenan den e diferente districtonan di Paradera, Oranjestad, San Nicolas, Savaneta, Noord y Santa Cruz, y e biaha aki mas cerca den bo bario! E curso ta consisti di dos dia, y lo trata 4 topico cu lo enfoka riba con nos por maneha nos finansa cada dia.
Dia 1: Mi ta efectivo den mi cas? Con mi por spaar y tambe con pa cumpra sin emocion? Kico lo pasa ora mi no por paga mi debe mas?
Dia 2: Mi ta inverti den mi futuro. Futuro di nos y nos yuinan ta importante y con nos por logra nos metanan. Presupuesto: Kico ta luho y prioridad y con segun bo entrada bo por presupuesta y asina logra nos metanan?
Algo nobo di e dos edicion di e programa Finansa den mi Hogar ta cu lo bay mas cerca ainda di e ciudadanonan. Manera e prome edicion cu tabata un exito grandi, e programa lo wordo duna den tur 6 districto di Aruba pero lo bay mas cerca di e ciudadano como lo duna e curso den diferente bario di districtonan di Paradera, Oranjestad, San Nicolas, Savaneta, Noord y Santa Cruz.
Ta importante pa ofrece e curso gratis pero ta importante pa e ciudadano haya e curso cerca di su cas. Esaki ta un motibo pa kico a trece e cambio den e proyecto pa haci esaki mas exitoso y pa asina stimula mas pa ciudadanonan participa. E curso aki ta pa cada ciudadano y su desaroyo y participacion segun minister Geoffrey Wever.
Mirando e interes grandi- demostra durante e prome edicion di Finansa den mi Hogar, Minister Geoffrey Wever ta invita cada un cu ta desea di participa pa haci esaki pa asina haya e apoyo necesario pa un maneho di bo finansas. Registacion ta completamente gratis, pero cupo ta limita.
