Parlamentario Shailiny Tromp-Lee:
*El a entrega keho den caso di SSA 6 dia prome cu e show di Marisol Tromp
ORANJESTAD (AAN): E reunion publico di ayera tabata orkestra y planea, y desde un principio e meta tabata obvio. Mirando e direccion cu e reunion tabata bayendo mi a haya necesario pa accentua y recorda coleganan di oposicion e echo cu e caso cu nos ta atendiendo ta uno hopi grave, un situacion inaceptabel y cu sigur mester trata e topico cu hopi cautela.
Mi a enfatisa e hecho cu lastimamente desde inicio di e reunion nos por a ripara cu no tabatin ningun interes pa scucha minister cu a bin pa duna informacion y splicacion encuanto e situacion na Stichting Sportsubsidie Aruba (SSA).
Oposicion cu a pidi pa e reunion, no tabata kier a scucha minister y djey haci nan preguntanan. No obstante esaki Presidente a duna Minister su espacio. Mi mester bisa cu detayadamente Minister a pasa riba e proceso encamina pa su persona y alabes esun di SSA y hopi colega di oposicion no tabatin interes pa scucha mes. Nan tabata den un harimento constantemente demostrando nan inmadurez y desinteres, mientras nos tabata tratando un caso hopi delicado y serio. Pero nos no por a spera otro pasobra nan a bin cu un solo meta: pa entrega un mocion di desconfiansa. Un reunion pa desacredita y cuestiona minister Endy Croes.
E informacion y splicacion duna pa Minister Croes sigur a pone coleganan di oposicion bruha completamente caminda minister a bari for di mesa nan cuestionamento sin base y acusacionnan sugestivo. Pasobra claramente Minister y Raad van Toezicht di SSA a atende cu e caso debidamente unabes e iregularidadnan a bira conoci.
Dia 6 di september 2024 Minister a keda informa, a encamina su propio proceso a base di consehonan huridico, Raad van Toezicht a start un investigacion interno na SSA pa wak si tin mas iregularidad, SSA y Minister a reuni cu e persona en cuestion, e la keda suspendi na SSA, a kita yabi, computer etc for di dje, djey e persona en cuestion a retira y keho a keda entrega door di Minister dia 20 di september 2024 pa falsificacion di su firma. Un informacion cu pa prome biaha Minister a duna y a pone e prueba tambe ter inzage. Pa loke ta SSA Minister Croes a informa cu nan a entrega keho dia 25 di september 2024.
E pruebanan aki ta demostra cu Minister Endy Croes contrario na tur speculacion, atake y cuestionamento door di oposicion a atende e situacion lihe y delingentemente. No 1, no 2 pero 6 dia prome cu Marisol Tromp a bay entrega keho ya caba Minister Croes a entrega keho na Landsrecherche. Sigur nos por a ripara cu esaki a saca oposicion ful for di base. Mesora nan a cambia di direccion di atake y a lubida completamente kico tabata e topico pakico e reunion a wordo yama inicialmente pero e mocion si nan a mantene constantemente riba mesa.
Un mocion ridiculo y sin base, cu nan a entreg’e prome, djey retir’e y entrega un otro. Meta tabata y ta pa retira un minister no matter what. Un minister cu a bin ta traha bon y di curason y cu a demostra detayadamente cu e la actua debidamente y sigur no ta brasa corupcion of busca manera pa hustific’e.
