Lider di PPA, Otmar Oduber ta cuestiona:
- Keto bay e ta sigui riba su stoel di gobernante
ORANJESTAD (AAN) “Ayera, den Parlamento di Aruba, tabata un berguenza enorme di a mira un biaha mas con parlamentarionan ta lastra otro den un Parlamento. Con un ta yama otro mas corupto, manera un competencia con ‘mi por a tira mas lodo di un banda pa otro”, Otmar Oduber, lider di PPA, a subraya den conferencia di prensa.
“Y mi ta inclui tur esun cu tabata den Parlamento: 21 miembro di Parlamento; di tur partido, incluyendo esnan cu ta bay forma partido nobo den futuro. Ayera nan a papia di etica, mi a scucha nan papia di principio, y awe nos tin un situacion, caminda cu no solamente bo tin un minister mas cu aworaki nan a perde confianza di Parlamento di Aruba, y keto bay ta keda sinta den stoel di gobernante”, Otmar Oduber a señala.
El a agrega cu esaki kiermen cu 1: como gobierno bo no ta respeta Parlamento, of 2: como Parlamento bo no ta haci bo mes wordo respeta cu bo decisionnan manera cu a tuma lugar aki.
“Den cualkier pais civico, ya caba awe mainta trempan, e minister ken cu por ta, na momento cu tin un decision den Parlamento, mester a entrega su carta di retiro pa e momento ey bisa cu ‘apesar cu mi ta demisionario, apesar cu gobierno a bay cas pasobra tin un eleccion mi no por sigui den e stoel sinta tumando decisionnan manera cu nada a pasa’, siendo cu e no tin un mayoria pa sosten’e den Parlamento”, Otmar Oduber a remarca.
