ORANJESTAD (AAN): Dialuna atardi hunto cu Minister President sra. Evelyn Wever–Croes y
Parlamentario sr. Alvin Molina, Minister Endy Croes a ricibi bishita di presidente di Kiwanis Club of San Nicolas sra. Endrah Richardson-Gumbs y vice- presidente sra. Joanette Vrutaal. Kiwanis Club of San Nicolas ta un organisacion di boluntario y ta conta cu 29 miembro activo den e distrito di San Nicolas.
Durante e encuentro ameno sra. Richardson – Gumbs duna nan splicacion amplio di e proyectonan cu Kiwanis Club of San Nicolas ta haci na bienestar di e muchanan di San Nicolas, como tambe e logronan cu e club a obtene durante nan dos aña di existencia.
Un di e proyecto cu a wordo presenta tabata ‘Smile Drive’. E proyecto ta encera cu cada persona cu cumpra un tumbler, ta contribui pa un mucha di menos recurso por bishita dentista pa haya su saneringsbrief pa despues e por drenta den sistema di AZV.
Segun Minister Croes, nan tambe a ricibi invitacion pa asisti e ‘Charter /Installation Event’ di club di servicio di hoben pa hoben ‘Builders Club Filomena College’ cu lo ta bou guia di Kiwanis Club of San Nicolas. E ta un proyecto pa hobennan di Filomena College MAVO unda lo siña e hobennan entre otro; liderazgo, e importancia di traha den ekipo y duna bek comunidad.
Den nomber di Gobierno di Aruba nan ta gradici Kiwanis Club of San Nicolas pe bunita trabou cu nan ta haci pe muchanan di Aruba specialmente pe distrito di San Nicolas y becindario.
