Vuelo di American Airlines cu 147 persona abordo
ORANJESTAD (AAN): Un situacion di emergencia a presenta su mes Diaranson atardi na Aeropuerto di Aruba, ora cu capitan di un avion cu a caba di bandona Aruba a declara emergencia.
Vuelo 534 di American, cu a lanta pa 2:53 pm for di Aeropuerto di Aruba, tabata rumbo pa Philadelphia, y algun minuut despues pa 3:00 pm cu e ta subiendo, yegando na 11.500 pia di altura, e prome oficial den cockpit a comunica cu Curacao Radar Control, bisando cu nan kier stop di subi mas, y cu nan tin mester di bay bek Aruba mesora.
Mesora Curacao a bisa e piloto pa keda na mesun altura. E siguiente transmision di e piloto di e Airbus A320-214 a cuminza cu Mayday-Mayday-Mayday, pues e ta declarando emergencia, y a indica cu e kier bin bek pa Aruba y mester di vectors. Aki ta unda el a anuncia cu nan a haya un Warning den cockpit cu tin aglomeracion di huma den e compartimento di cargo/maleta den e avion. Pues nan kier bay bek Aruba lo mas rapido cu por.
Curacao Control, mesora a bise pa e baha bek na altura di 7.000 pia, y pa e bira na su man robez pa 275 grado.
Mesun momento Curacao Control a manda mensahe pa vuelo jetBlue 1457 cu ta yegando Aruba tambe, pa e bira bay mas pabao y bay keda circula pabao di e isla, pa asina traha espacio pa laga e avion di American Airlines haya prioridad pa regresa Aruba.
Como cu avionnan Airbus A320 no tin sistema pa dump fuel durante vuelo, y esey ta debi cu e limitenan di aterizahe y subida ta mescos. A sigui duna e avion un waypoint y despues bise pa baha te na 2.500 pia. Mientras tanto den avion e pasaheronan a wordo avisa di loke ta pasando, y a ser avisa cu nan lo haci un aterizahe di emergencia na Aruba. E pilotonan mientras tanto a haci un serie di checklist prome cu nan baha bek, y nan a haci esaki na forma eficiente y a keda cla rapido. E forma con e piloto tabata comunica cu Curacao Control tambe tabata hopi calmo.
Mientras tanto Curacao Control a pone Toren di Control na Aruba di e emergencia, y a inclui e detaye di e piloto kende a indica cu abordo tin 147 alma, y e avion tin como 5 ora di combustible abordo. A mustra tambe cu e Warning di huma of candela den e compartimento di maleta, ta cende y bay bek cada rato.
E Groot Alarm aki pa Aruba a pone cu a notifica Polis cu mesora a cera e camindanan cu tin rond di Aeropuerto, y casi tur unidad di Ambulans a cuminza manda rumbo pa Aeropuerto. Crash Trucks di Cuerpo di Bombero tambe a wordo cendi y prepara pa tur cos.
Exactamente 14 minuut despues di a declara Mayday, e avion Airbus A320 a baha bek pa 3:14 pm na Aruba. E vuelo mes a dura djis 21 minuut y pico. Ora di baha, e Piloto a bisa cu e lo keda staciona mey-mey di e pista di aterizahe, mientras cu vehiculonan di Bombero a yega pa check e avion di pafo. E inspeccion aki a dura como 20 minuut.
Como cu no a mira huma ni nada extraordinario pafo di e avion, despues di un inspeccion na e resto di e aparato, na final pa 3:35 pm a duna OK pa e avion sigui taxi y bay na e plataforma y a bay para mas aleha di e Terminal, esta mas pabao cerca di e area unda ta procesa cargo.
Despues di esey e pista di aterizahe a habri bek.
OTRO VUELONAN: E momento ey tabatin e Airbus A320 cu ta e jetBlue vuelo 1457 procedente di New York cu a bay den un patronchi di espera (‘holding pattern’) na parti noordwest di Aruba, draai den circulo na 4.000 pia di haltura. Pero un otro avion, esta un ATR-72 di Winair tambe cu a bin for di St. Maarten y a haci un escala prome na Curacao, no por a baha. E tambe a wordo manda pa keda circula pabao di Aruba.
Ora cu e pista di aterizahe a habri bek, e jetBlue 1457 cu tabata bulando den circulo pabao di Aruba a bira y ateriza pa 3:41 pm na Aruba. E avion di Winair tambe finalmente pa 3:47 pm a baha na Aruba.
ALARMA FALSO: E hecho cu no a mira nada di huma pafo di e avion, a pone pensa mesora cu lo ta un fayo di sensor lo a causa esaki. Esey ta pone cu prome cu e avion aki por lanta vuelo bek, tin di bay revisa tur esaki y posiblemente cambia e sensor cu a detecta e huma aki, prome cu e Airbus A320 por subi bek atrobe.
Te cu 6’or di atardi a nota cu keto bay e avion ta na Aruba.
