Tur esnan cu no a paga nan permiso ainda:
- Prome cu saca nan for di e sistema
ORANJESTAD (AAN) Minister di Husticia mr. Arthur Dowers, durante un conferencia di prensa convoca na oficina di Gobierno, a bisa cu e sa cu den pasado, por ta pa motibo di funcionamento y tambe di e organizacionnan mes, no tur ora e doñonan di trabao tabata tin e pasenshi pa warda, pasobra por ta nan negoshi no por a draai sin trahadornan indocumenta.
“Pero nos ta kere si, cu e momento a yega, pasobra nos a mira cu migracion tin e calidad di servicio, tambe un aumento di procesamento di tempo pa procesa un permiso, y na e momentonan aki ta haciendo analisis mas profundo, pa mira con ta bay mehora e servicio cu DIMAS ta duna y pa procesa e permisonan mas lihe. Mi ta spera cu tur hende lo bay tene cuenta cu esaki, y si bo kier haci un peticion pa un hende bin traha na Aruba, laga e persona warda e decision riba e peticion aki, pafo di Pais Aruba”, e dignatario a señala.
Na di dos lugar, Minister Dowers a señala, nan a constata cu tin varios persona cu a solicita permiso aña pasa, y nan ta calcula cu ta mas di 500 persona, y no a paga pa e permiso.
“Ta importante cu hendenan cu a solicita un permiso y no a pag’e, pa nan paga e simannan aki te fin di Januari, pasobra pa fin di luna si nan no a paga, nos lo cuminza saca nan for di e sistema, y e ora ey bo no tin peticion valido mas.
Tambe ta importante si bo ta bisa “ mi a paga, pero no ta mira ningun movecion, mi ta mira cu e sistema no a paga”, anto tuma contacto nos pa nos wak si tin un problema eynan”, Minister Dowers a bisa.
En todo caso, Minister Dowers tin un recomendacion pa tur esnan cu no a paga na e momentonan aki, pa nan paga pa nan permiso.
“Nos a ripara tambe cu tin hende cu ta biba pa hopi aña na Aruba sin un permiso. Tin un señora di 84 aña cu tin mas di 40 aña na Aruba, y na e momento aki ta ilegal. Tin otro personanan cu ta riba 60 aña y ta cobra pensioen pero cu tambe ta ilegal. Por mira cu e sistema a laga cierto hendenan cay afo, y na tur e personanan aki mi ta recomenda nan pa tuma contacto of busca informacion pa mira si nan situacion por wordo regla, of si nan ta yega un caminda cu nan mester yega na otro decision”, Minister Dowers a enfatiza.
