Segun señor Thomas Ruiz di VRA:
ORANJESTAD (AAN): Den un entrevista recien cu DIARIO, señor Thomas Ruiz di Asociacion Vereniging Rijscholen Aruba (VRA) a declara cu leynan di trafico di Aruba ta anticua y lo mester actualisa nan. Tin hopi cos cu a bin acerca y hopi cos cu a elimina den trafico. Entre otro a bin vehiculonan moderno manera e-bikes y a elimina luz di trafico.
Segun señor Ruiz, lesnan di examen pa pasa rijbewijs no ta cuadra cu situacionnan actual. Un ehempel di esaki ta preguntanan pa examen tocante luz di trafico mientras esakinan no tey mas. Tampoco tin nada riba vehiculonan electronico y kico por haci si no ta scucha e vehiculonan aki riba caminda.
Señor Ruiz a enfatisa cu usuarionan di trafico mester ta mas responsabel tambe den trafico. Segun el a menciona, e causa number un di accidente den aña 2025 tabata falta di pone atencion den trafico.
Banda di leynan anticua y cu mester wordo actualisa, señor Ruiz a menciona cu usuarionan di trafico mester conoce, y aplica leynan existente. Entre otro leynan pa peatonnan. Segun Ruiz, nan mester haci nan mes mas visibel riba caminda y respeta ley y conoce y aplica e leynan di peaton pa evita problema.
Tambe mester tene cuenta cu ley di Favi cu ta bisa cu tur persona cu limitacion di mobilidad, y cu baston di guia, tin preferencia. Limitacion di mobilidad ta encera hende ciego, hende den rolstoel, hende cu pia kibra, hende di edad cu ta move slow, entre otro.
Segun Ruiz, esakinan ta leynan di trafico cu a cambia pero no a haya mucho programanan pa conscientisa pueblo di esaki, por lo tanto, hopi hende no conoce nan y no ta aplica nan tampoco.
