Minister Dowers ta fortifica cooperacion den Reino cu enfoke riba cuido y siguridad

Den cadena hudicial

ORANJESTAD (AAN): Diaranson mainta, Minister di Husticia, Integridad, Transporte Publico y Energia, mr. drs. Arthur Dowers, a haci un bishita importante na Zorg en Veiligheidshuis Hollands Midden na Leiden, Hulanda.

   E bishita tabata enfoca riba fortifica cooperacion entre instancianan, cu enfoke special riba integracion di e parti di cuido den e cadena hudicial. E obhetivo principal ta pa crea un colaboracion structural unda tur partner, tanto den e parti hudicial como den e parti di cuido, ta traha hunto riba bienestar, cuido y proteccion di personanan cu ta enfrenta situacionnan compleho.

   Zorg en Veiligheidshuis Hollands Midden ta un bon ehempel di con colaboracion multidisciplinario por resulta den un acercamento mas efectivo. E institucion ta brinda diferente servicio y ta conta cu varios experto bao di un solo dak y ta duna cuido na personanan cu ta enfrenta problema relaciona cu violencia domestico, maltrato di mucha, comportamento cu ta crea insiguridad y otro dificultadnan personal.

E modelo ta basa riba cooperacion continuo entre partnernan, unda ta comparti conocemento y experencia pa logra solucionnan sostenibel y pa preveni situacionnan di riesgo. Den e sistema aki, tur actor, desde servicio social te sector hudicial, ta contribui na un plan integral cu ta enfoca riba siguridad y bienestar di e persona.

   Minister Dowers ta mira necesidad pa un acercamento mas holistico y strategico, unda cuido y siguridad no ta separa, sino un responsabilidad comparti.

   Colaboracion den Reino ta esencial pa comparti conocemento y experencia, y pa sigui desaroya modelonan cu ta adapta na e realidad di Aruba.

   Cu e bishita aki, Minister Dowers ta reafirma su compromiso pa construi un sistema cu no solamente ta reacciona riba problema, pero cu ta preveni, guia y crea oportunidad pa un futuro mas sigur y sostenibel pa tur ciudadano.