Minister Dowers keda impresiona cu e Centro di EUROJUST na Den Haag

ORANJESTAD (AAN): Durante su recien bishita di trabao na Hulanda, Minister di Husticia mr. drs. Arthur Dowers a haci un bishita di cortesia na centro di EUROJUST situa na Den Haag.

Aki Minister Dowers a haya un splicacion amplio di e tarea di EUROJUST den continente Europeo.

E desaroyo mundial ta exigi cooperacion entre paisnan pa por contraaresta crimen organiza. Desde cu a forma Union Europeo, crimen organiza a crea un red di cooperacion criminal hopi avansa. Esaki ta netamente pa cual a bin cu EUROJUST den cual e systemanan hudicial di cada pais ta bin hunto na momento cu un caso criminal ta regarda mas cu un pais Europeo. E cooperacion entre e fiscalianan Europeo sinta hunto na Den Haag, ta yuda prepara intercepcionnan hudicial den casonan criminal.
   Eurojust ta un organizacion Europeo cu ta yuda paisnan den Union Europeo pa traha hunto contra delictonan serio cu ta crusa frontera, manera crimen organiza, terorismo, traficacion di hende, y fraude.

   E rol principal di EUROJUST ta duna ta como lo siguiente: (*) Coordinacion: Yuda autoridadnan di husticia di diferente pais pa traha hunto riba casonan complica.  (*) Sosten: Duna asistencia huridico y operacional pa investigacion y caso legal cu ta envolvi diferente pais. (*) Intercambio di informacion: Facilita e cambio sigur di informacion entre autoridadnan. (*) Reforsa accion legal: Acesora y yuda desaroya strategia hunto pa combati criminalidad.  (*) Centro di Reunion y coordinacion: Organiza reunion pa coordina casonan hunto entre paisnan.  E ta garantisa cu paisnan por traha hunto y tuma accion mas rapido contra delictonan cu ta crusa frontera.

   Minister Dowers a keda basta impresiona cu e operacion di EUROJUST pero tambe di e personal cu ta traha den e organizacion importante aki. Asina Minister Dowers a topa cu un Arubano trahando pa EUROJUST y a topa tambe cu ex Procurador General Alexander van Dam cu desde januari 2022 ta miembro nacional Hulandes di EUROJUST.