Minister Dowers a anuncia vacatura pa Aspirante Coreccional pa KIA

ORANJESTAD (AAN): Diaranson merdia, Minister di Husticia, mr. drs. Arthur Dowers, a anuncia oficialmente durante un conferencia di prensa

cu Gobierno ta habri vacatura pa candidatonan cu kier drenta den e opleiding di Aspirante Coreccional pa Instituto Coreccional KIA.

   Despues di basta tempo sin habri oportunidad pa incorpora personal nobo na Instituto Coreccional KIA, e decision aki ta bini den un momento strategico. Mirando e presion actual riba e personal existente y anticipando e construccion di e facilidad coreccional nobo, Minister Dowers a enfatisa cu ta esencial pa reforsa e sistema cu talento nobo. P’esey, lo habri un klas nobo pa periodo 2026-2027.

   Minister Dowers a pone enfasis riba e rol importante cu aspirantenan coreccional tin den mantene orden, traha bao presion y guia detenidonan cu dignidad. E funcion ta mas cu siguridad so; e ta inclui un contribucion activo na e proceso di resocialisacion di presonan, cu ta un pilar importante den e sistema di husticia.

   Pa cualifica, solicitantenan mester cumpli cu rekisitonan cla. Entre nan: nacionalidad Hulandes, un diploma di nivel MAVO 4, LTS T-stroom, EPB doorstroom, HAVO of EPI, edad entre 21 y 35 aña, y un haltura minimo di 1.60 meter. Ademas, cada candidato mester pasa evaluacion medico, psicotechnico y un prueba di condicion fisico, hunto cu un investigacion di antecedente. Dominio di Hulandes, Papiamento, Ingles y Spaño ta obligatorio.

   Interesadonan por entrega e siguiente documentonan; carta di motivacion, copia di diploma, dos pasfoto reciente (maximo 3 luna), papel di 5 Florin di Censo y CV, riba dianan 29 y 30 di april na Opleidingscentrum di KIA na Balashi, patras di Warda di Polis, entre 8:30 di mainta y 1’or di merdia. Pa esnan cu no por ta presente, tin opcion pa manda tur documento via email na This email address is being protected from spambots. You need JavaScript enabled to view it..

For di tur solicitante, lo selecciona e miho diescinco candidatonan cu lo forma parti di un trayecto intensivo di varios luna. Durante e periodo aki, candidatonan lo ricibi pago mensual y unabes cu nan termina e opleiding cu exito, nan lo drenta formalmente den servicio di Gobierno.

   Cu e iniciativa aki, Gobierno ta reafirma su compromiso cu un sistema di husticia mas fuerte, humano y sostenibel, unda profesionalismo, disciplina y respet pa dignidad humano ta central.