ORANJESTAD (AAN); Diaranson Ministerio di Turismo y Salud Publico a reuni cu ATA, Aruba Hotel and Tourism Association (AHATA),
departamento di impuesto y Banco Central. pa atende e cumplimento como tambe e proceso nobo di permiso pa vacation rentals (other accommodations), por ehempel esnan cu ta uza e plataformanan manera airbnb, vrbo, booking.com y otronan.
Segun Minister Oduber esaki ta sumamente importante pa crea y mantene e igualdad den e condicionnan pa por opera como negoshi aki na Aruba y crea e level playing field cu tin mester.
Minister Oduber a trece dilanti cu e discusion riba e cumplimento cu cada doño di cas mester tin, ora ta huur su cas of propiedad riba diferente plataformanan, ya ta andando pa varios aña. E fenomeno cu turistanan ta prefera di hospeda den un vacation rental ta algo cu pa algun aña caba ta andando rond mundo y ta un trend cu na Aruba tampoco ta diferente.
Na Aruba 30% porciento di nos bishitantenan ta kedando den e tipo di acomodacion aki, e mandatario ta indica.
Pa e motibo aki ta hopi importante pa bin cu un regulacion pa asina regula e vacation rental nan aki. Segun Minister Oduber ta importante pa crea e igualdad den e operacion di tur esnan cu ta huur acomodacion na Aruba. Tambe a papia riba e cumplimento di impuestonan cu e vacation rental lo mester cumpli cune. Gobierno tambe mester haya su fair share cu ta entre otro e “Tourism Levy”.
E mandatario a duna di conoce cu ya caba tin accionnan concreto cu a wordo determina kiko ta e siguiente pasonan. Minister Oduber a splica cu ya caba ta den proceso pa privatisacion di e unidad di Dienst Warenkeuring en Hygiene cu ta parti di DVG.
E idea ta pa e unidad aki bira un sui generis y encarga su mes cu henter e proceso di dunamento di permiso na e vacation rentals. Ta bay regula esaki a base di otorgamento di un permiso di gobierno cu tur e doñonan di e vacation rentals lo mester tin pa por opera. Actualmente den e proceso ta trahando riba e maneho y na mes momento e proceso di e privatisacion tambe ta canando su caminda.
E reunion aki tabata hopi importante y uni fructifero pa haya e input di ATA, AHATA, departamento di impuesto y Banco Central. E la yuda na haya un mihor bista riba e cantidad di vacation rentals cu tin na Aruba na e momentonan aki. Tambe cuanto di e vacation rentals ta cumpliendo cu nan obligacionnan y cuanto permiso lo por wordo otorga a base di e proceso nobo di permisologia.
Minister Oduber ta kere cu esaki ta un bon iniciativa y ta contento cu e tur e partidonan ta participando activamente den e proceso pa asina gobierno por regula e fenomeno di vacation rentals. Esaki na su turno lo bay crea e igualdad entre companianan y lo zorg pa tin cumplimento di tur e obligacionnan al respecto pa e doñonan di vacation rentals tambe. E mandatario a menciona cu e prome paso lo mester determina kiko ta bira e maneho y kiko ta bira e tarifa cu lo mester paga pa e permiso menciona.
Minister Oduber ta kere den approach di papia menos y haci mas por medio di accionan concreto pa yega na resultadonan desea.
