Minister di Salud y Turismo a anuncia drechamento di e plataforma dilanti Hotel Riu Palace Antillas

E lo bira un  atraccion pa local y turistanan:

ORANJESTAD (AAN) – Minister di Turismo y Salud, Dangui Oduber, tabata encarga cu e prome conferencia di prensa semanal di Gobierno, cu a tuma lugar riba e plataforma dilanti di Hotel Riu Palace Antillas.

Akinan e mandatario a anuncia otro proyecto turistico, cu aunke ta chikito e lo causa sigur un impacto grandi pa hende local y pa turistanan.

Minister Oduber a bisa cu tabata na aña 2018 cu nan gobierno a acerca Hotel Riu Palace Antillas pa yuda co-financia e tower di e plataforma e tempo ey.

Riu a bay di acuerdo pa co-financia mitad di e plataforma aki, pero gobierno a nota cu durante e ultimo añanan aki, debi na mal tempo y tur loke tabata pasando den nos naturaleza, den nos awanan, e plataforma aki a wordo afecta severamente, hasta a wordo kibra por completo, y Ministerio di Turismo y Aruba Tourism Authority a haya necesario percura pa haya e fondonan necesario pa financia e drechamento di e plataforma aki. E dignatario a splica cu e ta bay bira un plataforma hopi bunita, den forma di un octagon, cu den cada skina por subi e trapi y lo bay acerca artistanan local pa traha un bunita arte, na unda e tower ta.

E mandatario a expresa cu e plataforma aki ta bay bira un atraccion turistico, y mas sigur, locual no ta e caso na e momentonan aki. Minister Oduber a subraya cu conhuntamente cu ATA y DOW, a prepara esaki e ultimo temponan y aworaki e proyecto ta cla pa cuminza.

Minister ta corda con prome, cantidad di turista tabata posa pa potret den e plataforma pero awo e no ta den su miho condicion, y pesey e ta bay wordo reconstrui pa uso di local y turistanan.