Minister di Salubridad a anuncia cu proyecto ‘Steps Aruba 2023’ lo cuminza 4 di Maart

Ta bay colecta informacion pa tin mihor bista riba situacion di salud na Aruba

ORANJESTAD (AAN): Durante e conferencia di prensa di tur Dialuna di Gobierno, Minister di Salubridad Publico Dangui Oduber a papia riba e proyecto yama ‘Steps Aruba 2023’ cu ta un investigacion nacional riba factornan di riesgo pa loke ta desaroyo di malesa cronico no transmisible bao di e populacion di Aruba.

Oduber a indica cu lo cuminza cu e encuesta nacional di salud riba 4 di Maart 2023, unda cu lo acerca personanan entre 18 te cu 69 aña.

E intencion ta pa Gobierno di Aruba y Departamento di Salud Publico por haya datonan pa haci un mihor analisis di e situacion actual di salud di nos comunidad.

E mandatario a repasa tambe e maneho di ministerio di Salud di ultimo tempo, unda cu el a splica cu e maneho ta dirigi pa mehora calidad di cuido y servicio.

“Nos kier percura pa haci inversionnan continuo di cuido medico na Aruba, reduci e lista di espera y tambe percura pa e gastonan medico keda pagable y manehable, pa nos por keda ofrece e pakete di seguro cu nos ta ofrece na nos aseguradonan”.

Un punto principal di nos maneho ta prevencion y den cuadro di esaki e ‘Step Survey’ ta hopi importante, segun Oduber.

El a sigui bisa cu na aña 2020 caba el a lanza un plan nacional di prevencion di 2020-2030.

Den e plan atende cu diferente tema cu Gobierno kier ehecuta den e temponan cu ta bin.

“Un di e temanan importante tabata pa enfoca riba un asina yama ‘Healthy Lifestyle Center’ y siman pasa nos a logra presenta esaki oficialmente y haci apertura oficial di e centro aki, cu lo yuda tur persona na Aruba cu ta desea di adapta y cambia nan estilo di bida, pa tin un ‘lifestyle’ mas saludable y pesey nos a pensa cu e centro aki ta un bon instrumento, caminda cu profesionalnan, dietistanan, docternan etc. lo yuda guia tur e personanan cu tin e desea di cambia nan estilo di bida, segun e minister.

Oduber a indica tambe cu banda di esaki su ministerio a cuminza cu un programa tama ‘Jump 18’ dedica na mucha y hobennan entre 4 y 18 aña, cu e enfoke pa nan tambe cambia y adapta nan estilo di bida na uno mas saludable.

E mandatario a menciona tambe e proyecto di ‘ Scol Saludable’ y e intencion ta pa amplia e cantidad di scol cu ta participa na e proyecto aki, pa concientiza mucha y hoben for di trempan kico ta e importancia pa tin un bida mas saludable.

“Hunto cu Jeugdgezondheidszorg y ministerio di Enseñanza nos ta bay firma un MoU dentro di poco pa nos por cuminza ehecuta e proyecto pa nos amplia e cantidad di scol cu ta participa na e proyecto di scol saludable”, segun Oduber, kende a sigui bisa cu lo hiba diferente campaña di concientizacion pa informa y educa comunidad riba con importante ta pa tin un lifestyle saludable.

Parti di e plan nacional di prevencion di Gobierno ta tambe cu e tempo ey a wordo inclui tambe ta e prohibicion di huma cigaria den areanan publico, cu ya caba a bira un realidad.

E minister  ta contento cu tur caminda a cuminza adapta na esaki y dentro di poco lo drenta na vigor e prohibicion pa hende huma na cualkier parti di e tereno di hospital.

“Nos ta spera cu sector priva tambe tuma e bon ehempel di hospital, pa nos por sigui combati humamento den areanan publico”, segun Oduber.