ORANJESTAD(AAN): Recientemente DIARIO a entrevista minister di Husticia Rocco Tjon, relaciona cu e problema di pelea y gang cu lo tin na EPB Oranjestad.
E mandatario a splica cu el a wordo acerca pa minister di Enseñanza Endy Croes, pasobra tin algun preocupacion relaciona cu e scol.
“Nos a reuni cu e dirigentenan, e bestuur di EPB y tabata un reunion hopi positivo”.
Nos a traha palabracionnan pa yega na solucionnan a largo plazo, pero tambe mesora, segun Tjon.
El a sigui bisa cu despues di e reunion cu e tabata tin, e bestuur di EPB a reuni cu Alto Comisario di Cuerpo Policial y cu e persona encarga cu e cuido di bario y nan tambe a traha palabracionnan concreto.
“Mester bisa si cu loke e bestuur a trece pa dilanti ta cu ta un grupo chikito na e scol cu ta percura pa e molester y practicamente ta duna e scol un mal nomber tambe”.
Esaki ta di lamenta y e tin nos atencion, unda cu nos a traha palabracionnan pa a corto plazo aumenta vigilancia, pero tambe pa atende na un manera mas duradero ora cu algo sosode.
Na mes momento a haci palabracionnan pa eleva e seguridad a largo plazo, no solamente pa e alumnonan sino tambe pa e maestronan, segun e mandatario.
