Tocante menasanan contra Polis durante carnaval:
ORANJESTAD (AAN)—Minister Rocco Tjon, titular di Husticia Demisionario, a expresa cu den termino general, e mester bisa cu Aruba ta e pais mas safe den nos region y diferente investigacion tambe ta mustra esey.
“Esey tin di haber cu diferente inversion cu a wordo haci den tecnologia, den ekipo pa nos agentenan policial, pero hopi importante tambe ta e inversionnan cu a tuma lugar den e posicion di informacion.
Pasobra na final di dia, informacion ta haci posible cu bo por preveni y resolve casonan. E inversionnan aki, obviamente tin di haber semper cu e parti financiero, pero si wak tur e presupuestonan, nos a aumenta e fondonan pa cu KPA specificamente, y esaki obviamente ta conduci na e hecho cu nan por busca mas material, mas tecnologia, cu di e forma ey por combati mas criminalidad.
Pero, na final di dia obviamente e agente policial lo mester tuma decisionnan na momento cu lo presenta na cierto casonan”, Minister Rocco Tjon a señala. E mandatario a subraya cu esaki no ta un trabao facil, semper e ta bin cu su retonan pero, claramente, gobierno ta trata di duna nan mas herment, mas educacion y training pa nan por haci nan trabao di e miho manera posibel.
Tocante diferente mensahe di menasa, manera “nos ta cla”, “esaki t’e” den direccion di polis pa loke ta carnaval. E mandatario, na un forma contundente, a expresa cu ni un hende ta sali gana cu e tipo di menasanan aki, cu actonan cu kizas kier bay tuma contra Cuerpo Policial: “Y den e parti ey mi ta hopi claro, cu no lo tolera esaki. Absolutamente cu no!” Cuerpo Policial lo ta bon prepara atrobe, den e parti di informacion y lo actua tambe contra e menasanan aki.
“Pasobra, na final di dia, como Autoridad, como Cuerpo Policial, for di e parti di Husticia tambe nos kier garantiza seguridad pa un y tur, y vooral ora ta trata di actividadnan publico unda cu tin hopi persona cu ta bay atende cu esaki, nos tin cu garantiza seguridad pa tur esnan cu ta bay wak carnaval, cu ta bay participa den carnaval”, e dignatario a manifesta.
El a reitera cu menasanan no lo wordo tolera, y a indica cu Alto Mando tin tambe bon comunicacion cu Ministerio Publico, pasobra ningun hende lo sali gana si bay tin actonan di violencia durante carnaval.
