ORANJESTAD (AAN) – Minister di Finanzas y Cultura, Xiomara Maduro, a splica den conferencia di prensa di gobierno,
Diahuebs ultimo, cu a traha hopi duro pa baha e deficit presupuestario.
E dignatario a trece dilanti cu na aña 2019, a conoce un surplus chikito di 4% pero despues e pandemia a bin y a afecta Aruba hopi duro, a conoce un deficit di un billion florin (mil miyon florin) y di eynan por wak cu trabaonan ta wordo haci pa keda stabilisa e situacion, pero tambe asina por keda baha e deficit y no crea debe innecesario.
“Pero claramente, Pais Aruba ta recuperando y pesey aworaki, no por conta cu un situacion di surplus, despues di por a pasa den un pandemia cu sigur mundo, y particularmente Aruba, a dal su economia na unda cu un tercer parti di nos economia a bay perdi y hunto cune e entrada pa Pais Aruba”, e mandatario a expresa.
Minister Maduro a bisa cu di otro banda, a duna comercio e sosten necesario pa Aruba por a keda intacto y asina cu a bolbe habri fronteranan, e pais por a bin bek riba pia.
“E presupuesto cu nos ta bay presenta awe, tin un deficit chikito ainda, pasobra nos tin cu keda realistico den e situacion unda nos economia ta creciendo, y pesey e ora ey bo no por bay kibra nos economia door di bay baha bo deficit completamente” Minister Maduro a splica.
Esey tambe tin su repercusion pa cu e economia di Pais Aruba, segun e mandatario. “Nos ta reconoce e hecho cu Pais Aruba tin un debe grandi, y pa esey tambe nos a traha cu e seriedad pa sigur na momento di pandemia por keda contene e gastonan di gobierno, cu no mester crea debenan innecesario y aworaki, claramente, nos ta trahando pa reduci e deficit mas tanto posible, y cune contene locual cu ta e debe di nos pais”, Minister Xiomara Maduro a subraya. Seguidamente, e dignatario a duna e cifranan di mas importante cu a presenta den e presupuesto.
