Minister di Finanzas a anuncia cu el a entrega presupuesto 2023 riba dia 1 September 2022

A percura un Dia Historico:

ORANJESTAD (AAN) – Durante e conferencia di prensa di gobierno, Diahuebs 1 di September, minister di finanzas y cultura Xiomara Maduro a hiba palabra, y elabora tocante e presupuesto 2023.

            E tabata hunto cu e director di Departamento di Finanzas, señor Werleman, y tambe e Hefe di Presupuesto di Pais Aruba, señora Kock.

            E mandatario a señala cu nan hunto a haci un trabao hopi grandi y a percura pa e fecha aki, ta un Dia Historico.

            Esaki pasobra despues di 15 aña, atrobe e ta cumpli cu su responsabilidad conforme loke Aruba su Constitucion ta prescribi, pa por entrega e presupuesto di 2023, dia 1 di September.

            E dignatario, prome cu drenta den detaye, a gradici e ekipo cu a traha incansablemente, pa asina por a logra esaki, mustrando e seriedad cu gobierno ta traha cune, pa asina yega un dia, no mucho leu di awe, pa logra un fianzanan publico sostenible.

            E dignatario a splica cu tin procesonan cu ta wordo hiba a cabo, cu den e añanan cu a transcuri no ta tur ora a bay conforme di locual cu ta stipulacionnan di Aruba su Constitucion, pero a traha incansablemente pa dia 1 di September por a cumpli cu e parti aki stipula den e Constitucion y por a entrega e presupuesto na Parlamento di Aruba, Diahuebs mainta. Mas detaye lo por lesa den otro articulo.