ORANJESTAD (AAN) – E titular di Enseñanza y Deporte, señor Endy Croes, a elabora tocante e mudamento di Reina Beatrix School pa e edificio di antes Scol Paso Pa Futuro,
cual na su bez a muda pa e edificio unda Scol Reina Beatrix tabata ubica, na Seroe Blanco (ex-Schakel). E tabata un sorto di intercambio di edificio di ambos scol.
Minister Croes a señala cu na Juli ultimo caba, a cuminza ehecuta e cambio di scol, unda cu Reina Beatrix, cu tin alrededor di 315 alumno, tabata situa den un edificio cu tabata tin ocho local, na Seroe Blanco (antes Schakel) y un parti na YMCA Dakota. School Reina Beatrix a wordo gesplit desde 2014 cu el a wordo cera door di e gobierno anterior. Aworaki, e edificio original a bira un monumento y ta mucho mas dificil y costoso pa wordo drecha bek, segun e mandatario.
E edificio unda Scol Reina Beatrix ta awo, ta situa pabao di La Sale College, cerca di Post Kantoor na Playa cu ta un scol cu tin 17 local, y a yega na un acuerdo cu e cabesante y docentenan pa haci e cambio aki. E mandatario ta contento di a wordo informa cu Diahuebs di e siman aki tabata e prome dia di scol pa e alumnonan di Scol Reina Beatrix.
Minister Croes a menciona cu na Juli a verf e localnan y e gangnan, y dentro di poco, lo drecha e cura. Ta detayenan chikito cu a falta, pero e dignatario a scucha di Juffrouw Rosalinda, cu scol ta masha contento cu tur klasnan ta, atrobe, den e mesun edificio. Aworaki 15 local ta den funcion y nan tin nan gyzaal tambe. Pues, e scol ta completo y e mandatario a sinti cu tur e docentenan y cabesante ta sumamente contento. Minister Croes ta felicita Scol Reina Beatrix cu e logro aki.
E mandatario a yama danki na cabesante di Scol Paso pa Futuro tambe, cu a colabora den e proceso di intercambio di edificio di ambos scol. Paso pa Futuro ta bay funciona den e edificio na Seroe Blanco mirando cu e ta un scol chikito di 115 alumno.
