ORANJESTAD (AAN): Minister di Economia, Geoffrey Wever, a anuncia dialuna mainta e lansamento di e asina yama 'Youth Entrepreneur Summit' (YeS), cual lo tuma lugar na San Nicolas.
Presente tabata Endrah Gumbs, di Kiwanis Club San Nicolas; Louella Croes di IDEA, Olivier Vieira di Qredits, y Jeremy Croes di Spinup, cu ta e partnernan den e organizacion di dicho evento.
Ta trata di un evento di dos dia, dirigi na inspira hobennan, vooral esnan den e area pariba di brug, cu kizas tin e idea, entusiasmo y gana pa un dia tin nan propio empresa, y cu ta mira e potencial economico di e area aki di Aruba.
Ta bay tin discursonan, unda nan a invita un orado internacional y local. Ta bay tin un dia
interactivo, unda ta bay organiza varios “brainstorm sessions” den cual ta bay laga e hobennan participa den tayernan di trabao, unda no solamente nan ta bay ricibi informacion di un banda, pero tambe laga nan participa activamente y siña habilidadnan.
E meta ta pa crea lidernan local nobo y pa haci esey mester inverti den nan, inspira nan, y pa e motibo ey a dicidi di organiza e “summit” aki.
