Minister di Economia hopi orguyoso cu IDEA den transcurso di dies aña a crece y madura

ORANJESTAD (AAN)—Minister di Economia, Comunicacion y Desaroyo Sostenible mr. Geoffrey Wever,

den su discurso entorno e di dies aniversario di IDEA, a recorda un proyecto unda IDEA a traha cu Tra'imerdia, pa cuminza cultiva den e muchanan e idea di por bira un comerciante.

E dignatario a subraya cu den transcurso di e añanan IDEA a keda crece y madura, pero e pandemia a pone cu IDEA mester a bolbe adapta y alinea na e necesidadnan nobo di e companianan mediano y chikito. Esaki a haci cu IDEA mester a cambia su manera di traha, cu enfoke riba instrumentonan pa apoya e cliente. “A opta pa adapta e website di IDEA pa ofrece un punto mas central di tur informacion relevante, pa e cliente, y a enfoca mas ainda na ofrece informacion corecto durante tayernan di trabao virtual.

E ultimo diez añanan cu a pasa a keda demostra cu IDEA ta keda fuerte y resiliente. E decada nobo cu IDEA ta inicia awe, ta un comienzo nobo pa sigui fortalece idea cu e meta comun, cu nos tur lo continua e cooperacion y stimula mas actividad economico pa crea mas y miho cuponan di trabao pa nos hendenan”, e mandatario a expresa, indicando ademas cu IDEA a implementa hopi proyecto y tin proyectonan nobo cu e instituto lo implementa, den e periodo dilanti. El a señala cu por mira atras momentonan duro unda mester a reinventa IDEA. “Y den futuro nos ta spera mas momento cu por comparti y celebra hunto cu boso, amigonan, clientenan y partnernan strategico. Y asina, mi por bisa tambe cu mi ta orguyoso di forma parti di e esfuerzo aki”, Minister Wever a acentua.

El a conclui gradiciendo e presencia di e personal y tur otro persona cu a bin celebra e 10 aniversario di IDEA; el a felicita e Departamento di Asuntonan Economico, su directora señora Maria Pita Dijkhoff, y tur su empleadonan.

CERTIFICADONAN PA PRENSA:

Un momento hopi agradable tambe, ta ora cu diferente miembro di prensa a haya un certificado di gratitud, pa a coopera dunando cobertura na IDEA, su proyectonan y desaroyo en general.