ORANJESTAD (AAN): Diahuebs Minister di Turismo y Salud Publico Sr. Dangui Oduber a reuni cu ATA, DOW y DIP caminda a papia riba e proyectonan di Baby Beach y Rodgers Beach cu ta parti di e master plan cu tin pa Sero Colorado.
E proyectonan aki ta bay eleva henter e area rond di e dos playanan aki teniendo na cuenta cu nos naturalesa creando asina un desaroyo di embeyecimento di e area na un manera sostenibel.
E proyecto di Baby Beach fase 1 ya caba a keda entrega aña pasa y awor ta bezig cu e segundo fase di e proyecto aki. Otro proyecto cu ta finalisando fin di april ta e proyecto di renobacion di e trapi na Rodgers Beach. E trapi aki ta un punto di acceso hopi importante pa Rodgers Beach mirando tur e cambionan cu henter e area aki lo bay conoce ora cu e proyecto keda finalisa.
Rodgers Beach lo bay haya un area di parkeo completamente nobo mescos ta e caso pa Baby Beach tambe. Tur dos area lo bay haya facilidadnan caminda hende por bay cumpra cuminda y/of bebida y tambe lo tin bañonan publico pa tur bishitante. Ta bay bin facilidadnan caminda por practica “beach sport” manera beach tennis y beach volleyball.
Minister Oduber a crea un comision di proyecto infrastructural di turismo cu ta keda lidera pa Ministerio di Turismo. E comision aki lo bay traha mas di cerca cu DIP pa asina e maneho cu a keda crea pa cu e beach nan wordo implementa. E desaroyo aki ta uno sostenibel. Pesey a dicidi tambe cu den e proyecto aki lo bay planta hopi palma di coco pa crea sombra pa asina limita e construccion di palapa ariba e beach.
Turismo ta e driver di nos economia y pesei su desaroyo ta keda un prioridad. E gobierno aki ta para pa turismo di calidad, e turista cu ta bin pa gasta placa y contribui na nos economia. Pesey ta hopi importante pa sigui inverti den e producto Aruba. E proyectonan aki ta bay trece mas actividad pa San Nicolas pa asina percura cu e turista ta bin San Nicolas pa crea mas actividadnan economico.
E Minister a termina bisando cu “Keda sin haci nada pa San Nicolas NO ta un opcion mas. San Nicolas tin tur e potencial pa haya su fair share den e desaroyo di nos pais”. Den proximo simannan lo ta preparando e destaho publico pa Fase 2 di e proyecto di Baby Beach.
{gallery}Minister Dangui Oduber a reuni cu ATA, DOW y DIP riba proyectonan Baby Beach y Rodgers Beach{/gallery}
