Minister Cicilia a reconoce Marisa Carti como un pionero den e industria di turismo

Mas di 40 aña di dedicacion

ORANJESTAD (AAN): Diasabra atardi, Minister Wendrick Cicilia tabata presente na Faro Blanco pa rindi un homenahe y expresa palabra di gratitud na Marisa Carti kende a dedica 48 aña di su bida na yuda construi e base solido di turismo.  “E clave di e exito di nos industria turistico ta nos hendenan”, Minister mr. Wendrick Cicilia a expresa. 

Un trayecto di crecemento

For di su prome pasonan den e mundo di hospitalidad na aña 1977 na Aruba Concorde Hotel, Marisa a representa e balornan cu ta defini nos industria, esta servicio, resilencia y crecemento continuo. Loke a cuminsa como un rol na recepcion pronto a evoluciona den un trayecto di 15 aña di liderazgo y impacto. Marisa a subi di rangonan, for di Front Office Clerk pa Supervisor, pa Assistant Manager y eventualmente pa Front Office Manager y Manager On Duty- rolnan cu ta rekeri no solamente habilidad, pero tambe confiansa, presencia y compromiso profundo. 

Un ehempel

Marisa Carti ta un ehempel di lidernan den e industria di turismo. Pa Minister mr. Wendrick Cicilia ta importante pa reconoce nos lidernan y tur esnan cu ta un ehempel.  A reconoce Marisa Carti como un pionero cu a yuda construi e base solido cu nos tin awe. 

“Bo ta trahando pa bo propio pais”, tabata e mensahe di Marisa Carti na tur esnan cu ta iniciando den e industria di turismo. Ta importante pa haci e trabou cu hopi pasion, respet y amor.