Minister Arthur Dowers na groundbreaking di Incineratornan nobo

E lo bay destrui tur desperdicio medico

 *Nan ta cumpli cu standardnan Europeo 

ORANJESTAD (AAN)-- Minister di Husticia, Integracion y Transporte Publico, mr. Arthur Dowers, den entrevista cu DIARIO durante presentacion na Parkietenbos 2 na instalacion di AWSS su incinerator nobo, cu Gobierno ta bay dispone di dos incinerator nobo.

   E dignatario a señala cu, manera ta conoci, ora AVP-Futuro a drenta den gobierno nan a haya un situacion hopi desagradable, cu a bay completamente for di man, cu containernan yena cu desperdicio, bestia morto, desperdicio y di hospital.

   E mandatario a bisa cu un par di container cu tabata habri, expone, e contenido a wordo trata y despues a pone e incinerator funciona, y atende cu tur e problemanan cu tabata tin, e retonan legal cu tabata tin, y aworaki ta duna e siguiente pasonan pa bay padilanti, pa sigui traha den e proceso.

“Ta importante pa realiza cu bo no por, den un pais chikito manera nos, djis keda acumula sushi. E no ta funciona,  bo mester tin un manera, y esaki ta e manera tecnologico mas responsabel pa haci’e, como e pasonan mas importante awe pa sigui den e proceso ey y mi ta spera cu dentro di algun luna, nos por anuncia otro proyectonan tambe unda nos lo ta atendiendo, na un forma diferente, cu e problema di maneho di sushi den e Pais Aruba”, Minister Dowers a subraya.

   E mandatario a señala cu mester atende cu e sushedad en general, y tin camindanan cu hende por haya compensacion si no tin e modo financiero pa paga pa lanta sushi di cas, pero no ta un opcion pa tira sushi tur caminda, y gobierno ta bay actua tambe riba esaki.

“Nos ta analizando y ta bay traha riba e gruponan cu ta bay atende specificamente riba e tema aki. Separacion di sushi door di nos ciudadanonan ta den man di e departamentonan pa nan desaroya plannan con por haci esey den futuro, si ta bay separa, recicla y kico ta incinera, e ora ey”, Minister Dowers a menciona.