Minister a firma un MOU pa proyecto di educacion di nivel medio profesional na KIA

Educacion como yabi pa reintegracion

ORANJESTAD (AAN): Diaranson ultimo, Minister encarga cu Openbaar Avond Beroepsonderwijs Aruba (OABA) y Dienst Gevangeniswezen Aruba (DGWA) a firma un Memorandum of Understanding (MOU) pa e ofrecemento di educacion di nivel medio profesional (ABO/MBO) den Instituto Coreccional Nacional (KIA).

Cu e colaboracion aki, un paso importante ta wordo duna pa reforsa resocialisacion y reintegracion sostenibel di personanan deteni. Educacion ta wordo utilisa como un instrumento esencial pa amplia oportunidadnan di participacion laboral y reintegracion den sociedad.

E programa piloto ta inicia den 2026 y ta enfoca riba un grupo inicial di maximo diesdos (12) detenido. Nan lo sigui e formacion Asistente Metal, Electro y Instalacion (nivel 1), unda practica y siñamento digital ta wordo combina y asina yega na un diploma riba nivel 1 cu ‘civil effect’.

Den e trayecto di e formacion, e participantenan lo traha riba proyectonan concreto, manera fabrica hekwerknan pa scolnan. Di e manera aki, nan no solamente ta desaroya habilidadnan profesional, pero tambe ta contribui activamente na comunidad. E proceso di siña y traha ta bira un forma directo di duna bek na sociedad y construi un sentido di orguyo, responsabilidad y pertenencia.

E colaboracion aki ta representa un enfoke innovador unda siguridad, calidad di educacion y impacto social ta bin hunto.

E realisacion di e proyecto aki ta resultado di un colaboracion estrecho entre e Ministerio di Educacion y e Ministerio di Husticia. Un palabra di gradicimento ta bai na Openbaar Avond Beroepsonderwijs Aruba (OABA) y Instituto Coreccional Nacional (KIA) pa nan compromiso y esfuerso den haci e iniciativa aki posibel.

Cu e iniciativa aki, Ministerio di Educacion ta duna un paso concreto den direccion di un sociedad mas inclusivo, unda oportunidad y desaroyo di e ser humano ta central.